«QazAgro» basshysy Serbııaǵa jumys saparymen bardy

«QazAgro» ulttyq holdınginiń basqarma tóraǵasy Nurlybek Malelov Belgradqa jumys saparymen bardy, dep habarlaıdy holdıngtiń resmı saıty. Serbııadaǵy Qazaqstan elshiligi Memleket basshysy Nursultan Nazarbaevtyń 2016 jylǵy 23-26 tamyzdaǵy Serbııaǵa alǵashqy resmı sapary jáne Serbııa Respýblıkasy Premer-mınıstri Aleksandr Výchıchtiń 2016 jylǵy 14-16 qarashadaǵy Qazaqstanǵa resmı saparynyń sheńberinde qol jetkizilgen ýaǵdalastyqtardy oryndaý maqsatynda birqatar sharalar uıymdastyrdy. Atap aıtqanda, «QazAgro» ulttyq holdınginiń basqarma tóraǵasy N.Malelovtiń Serbııa Aýyl sharýashylyǵy jáne qorshaǵan ortany qorǵaý mınıstri B.Nedımovıchpen, Serbııa Saýda-ónerkásiptik palatasynyń prezıdentimen kezdesýleri, sondaı-aq Serbııanyń jetekshi aýyl sharýashylyǵy taýaryn óndirýshileriniń qatysýymen bıznes-forým ótkizildi. Kezdesýdiń basynda «QazAgro»-nyń basqarma tóraǵasy Serbııa tarapynyń ókilderin eldegi áleýmettik-ekonomıkalyq ahýalmen, Prezıdenttiń Qazaqstan halqyna Joldaýynyń negizgi erejelerimen, sondaı-aq Qazaqstan Parlamenti men Úkimetiniń ókilettikterin keńeıtýge baǵyttalǵan konstıtýsııalyq ózgeristermen tanystyrdy. «QazAgro» ulttyq holdınginiń qyzmeti, onyń mindetteri men iske asyrylatyn jobalary týraly baıandaldy. Basqarma tóraǵasy holdıngtiń qoldaý quraldaryn paıdalaný arqyly Qazaqstan men Serbııanyń aýyl sharýashylyǵy salasyndaǵy yntymaqtastyǵynyń jańa múmkindikteri týraly aıtyp berdi. Mysal retinde, Qazaqstan men Vengrııanyń arasyndaǵy ınvestısııalyq qor jumysynyń tabysty tájirıbesin zerttep bilý usynyldy. Serbııanyń Aýyl sharýashylyǵy jáne qorshaǵan ortany qorǵaý mınıstri óz tarapynan Qazaqstanmen aýyl sharýashylyǵy salasyndaǵy birlesken jobalardy iske asyrý úshin belsendi jumys júrgizýdi josparlaıtynyn jetkizdi. Atap aıtqanda, ol bıyl aýyl sharýashylyǵy salasynda qyzmet etetin bıznesmender tobymen Qazaqstanǵa saparmen barýǵa nıetti ekenin bildirdi.