О́kilettikterdi qaıta bólý boıynsha jańa zań jobalary ázirlendi

Barshańyzǵa belgili, bıylǵy jyldyń 25 qań­taryn­da Memleket basshysy Nursultan Nazarbaev óziniń ókilettigin memlekettik bılik tarmaqtary arasynda qaıta bólý máselesi bo­ıynsha arnaıy Úndeý joldaǵan bolatyn. Elbasy óz sózinde Prezıdenttiń keıbir ókilettikterin Parlament pen Úkimetke berýdiń eki negizgi baǵyty boıynsha tapsyrma berdi. Memleket basshysynyń zań júzinde bekitilgen ókilettigin qaıta bólý máselesi boıynsha Ádilet mınıstrliginiń júzege asyryp jatqan jumystary jóninde Ortalyq kommýnıkasııalar qyzmetinde ótken aqparat almasý alańynda zańnama departamentiniń dırektory Darhan Igembaev aıtyp berdi. Ol memlekettik bılik tarmaqtary arasynda ókilet­tikterdi qaıta bólý jumystaryn tıisti deń­geı­de atqarý úshin Elbasynyń О́kimimen arnaıy jumys toby qurylǵanyn atap ótti. Onyń quramyna mem­le­ket­tik organdar ókilderi, memleket jáne qoǵam qaı­rat­ kerleri kirdi. Prezıdent ókilettigin qaıta bólý jumysy eki baǵyt boıynsha júzege asyrylady: birinshi baǵyt – konstıtýsııalyq deńgeıde bılik tarmaqtary arasyndaǵy qarym-qatynastardy teńdestirý; ekinshisi – Úkimet pen basqa atqarýshy organdarǵa Prezıdenttiń zańmen belgilengen áleýmettik-ekonomıkalyq úderisterdi retteý jónindegi ókilettiginiń bóligin berý. Osy oraıda, departament dırektory ekinshi baǵyt boıynsha jumystardy atqarý Ádilet mınıstrligine tapsyrylǵanyn atap ótti. «Ádilet mınıstrliginiń jany­nan jumys toby qurylyp, olar 298 zań, 11 Kons­tıtýsııalyq zań men 20 kodekstiń mátinderine taldaý jasady. Nátıjesinde, Prezıdenttiń zańmen belgilengen áleýmettik-ekonomıkalyq úderisterdi retteý máseleleri boıynsha eki zań jobasynyń tujyrymdamasy ázirlendi. Olar: «Qazaqstan Respýblıkasynyń keıbir zańnamalyq aktilerine memlekettik bıliktiń tarmaqtary arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly» zań jobasynyń tujyrymdamasy jáne «Qazaqstan Respýblıkasynyń keıbir Konstıtýsııalyq zańdaryna memlekettik bıliktiń tarmaqtary arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly» Konstıtýsııalyq zań jobasynyń tujyrymdasy», dep atap ótti spıker. Aıta keteıik, búgingi tańda atalǵan eki zań jobasy Ashyq normatıvtik quqyqtyq aktilerdiń ınternet-portalynda jarııalanǵan. Aıdar О́RISBAEV, «Egemen Qazaqstan» ASTANA