Teriskeıdiń tabıǵaty qyzyqtyrypty

Oblystyq tarıhı-ólketaný murajaıyna Qazaqstandaǵy Shvesııa koroldigi elshiliginiń «IK Foundation» qory «Apostoly Lınneıa» ensıkopedııasyn tartý etti. Saltanatty rásimge elimizdegi Shvesııa koroldiginiń Tótenshe jáne ókiletti elshisi Hrıstıan Kamıll arnaıy keldi. HVIII ǵasyrda shved apostoly ári botanık Karl Lınneı óziniń shákirtterin álemniń ár tarapyna attandyryp, beıtanys el men jerdiń tynys-tirshiligi jaıly maǵlumattar jınastyrýdy tapsyrady. Onyń izbasarlarynyń biri Iogann Peter Falk Qazaqstannyń teriskeı aımaǵyn sharlap, Ertis, Esil ózenderiniń jaǵalaýlaryn qonystanǵan eldi mekender jáne Petropavl qalasynyń tabıǵat, jaǵrapııalyq erekshelikterine qatysty zertteýler júrgizedi. Sapardan oralǵan soń alǵan áserleri men baǵa jetpes derek­terdi qaǵazǵa túsirip, ustazyna tabystaıdy. «IK Foundation» qory ta­bıǵattyń tylsym syrlaryn zertteýmen kópten beri aınalysyp keledi. Onyń tóraǵasy Lars Iаnsen Iogann Falktiń jıǵan-tergen jazbalaryn soltústik óńirdiń tyń aqparattarymen tolyqtyryp, ensıklopedııa etip shyǵarǵan. Onda teriskeıdiń faýnasy men florasy, etnostar, Esil ózenine qatysty derekter toptastyrylǵan. Túrli ıllıýstrasııalyq sýrettermen bezendirilgen. Aǵylshyn tilinde ja­ryq kórgen Karl Lınneı shá­kirtteriniń jazbalary 11 tomdy quraıdy. Osy arqyly Skandınavııa eliniń turǵyndary Soltústik Qazaqstanǵa erekshe qyzyǵýshylyq tanytyp otyr, deıdi elshi. О́mir ESQALI, «Egemen Qazaqstan» Soltústik Qazaqstan oblysy