Qardan músin jasaýdyń has sheberi

Appaq qardan jasalǵan myna músinderdi aýyldyń qarapaıym turǵyny jasady degenge senesiz be? Quddy, kásibı músinshiniń qolynan shyqqandaı. Bul tamasha týyndylardyń avtory Nurlan Manaqov Semeıden 55 shaqyrym jerdegi, Borodýlıha aýdanyna qarasty Kamyshenka degen aýylda turady. Búginde aýyl jurtynyń qyzyǵa tamashalap, sýretke túse­tin súıikti ornyna aınalǵan músinderdiń jasalý tarıhy da qyzyq. − Bul músinderdi negizi nemereme arnap jasaǵan edim. Eki jarym jastaǵy nemerem: «Ata, aıý jasap bershi» dep qıyl­dy bir kúni. Nemereden neńdi aıaısyń? «Oıbaı-aý, sen úshin búkil Almatynyń zooparkin kóshirip ákelýge daıynmyn ǵoı, qulynym!» dep úıdiń aldyna Aıaz atasyn, aıýyn, arystanyn, maımylyn, áteshin jasap berdim. Qazir aýyldyń úlken-kishisiniń bári osynda kelip fotoǵa túsedi. Qyzyq nárse eken bul ózi, − deıdi altyn qoldy azamat. Aýyldyń kórkine aınalǵan qar músinderdi kórgennen keıin qyzyǵýshylar qatary artyp, «bizge de jasap berińiz» deýshiler kóbeıip, tapsyrys qarsha borapty. Alaıda, kezinde sportty, onyń ishinde grek-rım kúresin janyna serik etip, búginde jeke kásipkerlikpen aınalysyp júrgen keıipkerimiz buǵan ýaqytynyń joqtyǵyn, qardan músin jasaýǵa áýestik retinde qaraıtynyn aıtady. Tarbaǵataı aýdanynyń týma­sy kezinde Aqsýatta turǵan sha­ǵynda aýyl balalarymen birge muz aıdynyn jasap, qyrdyń qara do­malaqtarymen birge asyr salyp, máz-máıram kúı keshken sát­terin de saǵynyshpen eske aldy. − Syrttan kóz salǵan adamǵa bilinbeýi múmkin. Biraq aq qar, kók muzdan kelistirip músin ja­saý degenińiz ǵajap nárse. Dú­nıeniń barlyǵyn umytyp, ká­dimgideı terlep-tepship, ebil-debiliń shyǵyp jumys isteısiń. Boıyń jeńildep, bir rahattanyp qalasyń. Aqyndar jalyndatyp jyr jazyp, ánshiler áýelete án shyrqap, kúıshiler kúmbirlete kúı shertip ózinshe sher tarqatady. Demalady. Bireýler atqa minip, tazy júgirtip, endi bireýler qus salyp tynyǵady. Árkimniń óziniń áýestigi bar ǵoı. Bul da sondaı dúnıe, − deıdi Nurlan Manaqov. Azamat QASYM, «Egemen Qazaqstan» Shyǵys Qazaqstan oblysy