Chempıondar lıgasy. «Bavarııa» «Arsenaldy» oısyrata jeńdi (vıdeo)

Chempıondar lıgasynyń 1/8 fınalynda «Bavarııa» óz alańynda «Arsenaldy» qabyldap, 5:1 esebimen oısyrata utty. Sońǵy jyldary bul týrnırde qos komanda birneshe ret kezdesti. Alaıda, Londonnyń komandasy qansha tyrysyp baqqanmen, nemisterden aılasyn asyra almaı keledi. Bul jolǵy matchta dál osy baǵytta órbidi. Kezdesý bastalysymen alǵa umtylǵan mıýnhendikter 11-mınýtta esep ashyp úlgerdi. Arren Robben ádettegideı oń qaptaldan qaqpany dál kózdeı bildi. Matchtyń 30-mınýtynda aıyp alańyndaǵy talas kezinde Loran Koselnıge qarsy oıyn tártibi buzylǵannan keıin tóreshi oılanbastan penaltı belgiledi. Ony Aleksıs Sanches oryndap, múlt ketýdiń aldynda qaldy. Alǵashqy soqqysyn qaqpashy Manýel Noıer qaıtarǵanmen, ekinshi rette qarsy tura almady. Kezdesýdiń alǵashqy 45 mınýtynda budan keıin de birqatar shabýyl uıymdastyrylǵan, biraq esep ózgerissiz qaldy. Oıynnyń ekinshi taımy tolyqtaı «Bavarııanyń» basymdyǵymen ótti. 53-mınýtta oń qaptaldan Fılıpp Lamnyń áýeletken dobyna Robert Levandovskı birinshi bolyp jetip, óz ujymyn alǵa shyǵardy. Arada 3 mınýt óter-ótpes nemister eseptegi basymdyqty arttyra tústi. Levandovskıdiń tamasha pasynan keıin Tıago Alkantara qaqpashymen jeke shyǵyp, múmkindigin tıimdi paıdalandy. Al 63-mınýtta aıyp alańynyń syrtynan kezekti golyn saldy. Negizgi ýaqyttyń aıaqtalýyna eki mınýt qalǵanda Tomas Mıýller «Bavarııanyń» besinshi dobyn soqty. «Arsenal» bul joly da Germanııa chempıondarynan aılasyn asyra almady. Al qarymta kezdesý 7 naýryz kúni Londonda ótedi.