Chempıondar lıgasy. «Real» óz alańynda «Napolıden» basym tústi (vıdeo)

Chempıondar lıgasynyń 1/8 fınalynda Madrıdtiń «Realy» óz alańynda Neapoldiń «Napolıin» qabyldap, 3:1 esebimen basym tústi. Match bastalysymen tizgindi óz qolyna almaq bolǵan madrıdtikterdiń bul jospary birden júzege aspady. 8-mınýtta qaqpashy Keılor Navastyń qateligin utymdy paıdalanǵan Lorenso Insıne shamamen 30 metr jerden gol soǵyp, ıtalıandardy alǵa shyǵardy. Degenmen, olardyń bul qýanyshy uzaqqa sozyla qoımady. 19-mınýtta Danıel Karvahaldiń áýeletken dobyna birinshi bolyp jetken Karım Benzema tarazy basyn teńestire bildi. Kezdesýdiń ekinshi 45 mınýtynda «Real» aıqyn basymdyqqa ıe boldy. 49-mınýtta Krıshtıaný Ronaldýdyń bergen dobyn Tonı Kroos qaqpaǵa dál baǵyttap, alań ıelerin esepte alǵa shyǵardy. Arada 5 mınýt ótkennen keıin Kazemıro mergendigimen tanylyp, matchtaǵy sońǵy dopty soqty. Budan keıin de tablodaǵy kórsetkishti ózgertetin múmkindikter bolǵan, alaıda bári sátsiz aıaqtalyp jatty. Aıta keteıik, qos komandanyń arasyndaǵy qarymta kezdesý 7 naýryz kúni Neapolde ótedi.