2017 jyly 600 km jol paıdalanýǵa beriledi

2017 jyly 600-den astam shaqyrym jol paıdalanýǵa beriledi. Bul týraly QR Úkimetindegi baspasóz konferensııasynda QR ınvestısııalar jáne damý vıse-mınıstri Roman Sklıar málimdedi, dep jazady primeminister.kz.  Sonymen qatar, 2017 jyly respýblıkalyq mańyzdaǵy joldardyń 700 shaqyrymynda aqyly júıe engizý kózdelgen. Bul -  Astana – Temirtaý, Almaty – Qapshaǵaı jáne Almaty – Qorǵas ýchaskeleri. Aǵymdaǵy jyldyń qarasha aıynda júıeni testilik rejımde iske qosý kútilýde. 2020 jylǵa qaraı respýblıkalyq mańyzdaǵy 6 myń shaqyrym joldy aqyly etý josparlanǵan, bul jyl saıyn shamamen 30 mlrd teńge jınaýǵa múmkindik beredi. «Aqy tóletý júıesi avtojoldardy qamtýdyń ózin-ózi óteýine jáne bıýdjetke túsetin júktemeni azaıtýǵa múmkindik beredi», – dep atap ótti R. Sklıar. Vıse-mınıstr 2013 jyldan bastap respýblıkada jalǵyz aqyly ýchaske baryn eske salyp ótti. Ol – uzyndyǵy 217 shaqyrym bolatyn Astana – Shýchınsk. Atalǵan ýchaskede bekitilgen tarıf jeńil kólik úshin bir shaqyrymǵa 1 teńgeni quraıdy. R. Sklıar jańa ýchaskelerde bul tarıfterdi arttyrý josparlanbaǵanyn atap ótti. Balamaly ýchaskelerdi salý zańnamamyzda qarastyrylmaǵan. Oǵan qosa, R. Sklıar avtomobıl joldary sapanyń barlyq normatıvteri boıynsha qamtylatynyn basa aıtty. «Arnaıy zertteýler turaqty júrgizilip turady. Atalǵan zertteýlerge sáıkes JJM únemdeý jáne basqa da kórsetkishter jolda júrý úshin alynatyn aqydan áldeqaıda joǵary», – dedi vıse-mınıstr. Avtojoldardy paıdalanýshylarǵa qyzmet kórsetý boıynsha sapaly ınfraqurylymǵa erekshe kóńil bólinetin bolady. Qazirgi ýaqytta respýblıkalyq mańyzdaǵy joldardyń boıynda jol servısiniń jekelengen  2 myńnan astam nysany jumys jasaıdy, olardyń basym bóligi 2015 jyly qabyldanǵan ulttyq standarttarǵa sáıkes kelmeıdi.