Keshe elorda ákimi Áset Isekeshev turǵyndar aldynda esep berdi. Jıynǵa barlyq basqarmalar men vedomstvolar basshylary, máslıhat depýtattary, qoǵamdyq keńes ókilderi, kommýnaldyq qyzmetter jetekshileri qatysty. Qala basshysy aldymen ótken jylǵy negizgi ekonomıkalyq kórsetkishterge toqtalyp, Elbasy Nursultan Nazarbaevtyń bastamasymen qolǵa alynǵan «Nurly jol» ınfraqurylymdy damytý baǵdarlamasyn iske asyrý barysy, shaǵyn jáne orta bıznesti qoldaý, tehnologııalyq ındýstrııalandyrý sharalary týraly aıtyp berdi.
Jumyssyzdyq deńgeıi eń tómengi kórsetkishte
«Prezıdent bıyl da halyqqa Joldaýyn jarııa etip, táýelsiz memleketimizdiń úshinshi jańǵyrtýǵa aıaq basqanyn málimdedi. Mańyzdy qujat bizge jańa baǵyt berip, josparymyzdy aıqyndady. Árıne, olardyń barlyǵy Astananyń búgingi damýymen túgeldeı astasady», degen Á.Isekeshev bas shahar Eýrazııa keńistigindegi mańyzdy ortalyqqa aınalýy tıistigin aıtty. Ákimdik asa ózekti ótinishterdi qurylymdap, máselelerdi sheshý úshin aldaǵy úsh jylǵa naqty sharalar keshenin ázirlegen. «Biz qalanyń ár aýdanyna egjeı-tegjeı taldaý júrgizdik. «109», «Ákimdiktiń biryńǵaı elektrondy ótinishter júıesin» taldadyq. Áleýmettik nysandardy aralaýda, aýdan ákimderiniń halyqpen eseptik kezdesýlerinde, ashyq esik kúnderi jáne «Nur Otan» partııasy fılıaly sharalarynda maǵan 50 myńnan asa suraq, ótinish tústi», dedi qala ákimi. Á.Isekeshev qala halqyn jumyspen qamtý jáne áleýmettik qorǵaý máselelerine toqtaldy. Búginde ákimdik ataýly tólemderdiń otyzdan asa túrin júzege asyrady. Olar: qoǵamdyq kólikte jeńildikpen júrý, turǵyn úı kómegi, múgedekterdi áleýmettik qoldaý. Qalada 19 myńǵa jýyq jańa jumys orny quryldy. Jumyssyzdyq deńgeıi 4,6 paıyzǵa tómendegen. «526 avtobýs múgedekterdi mingizip, túsirýge arnaıy jaraqtalǵan, 956 aıaldama beketi edeni tómen qoǵamdyq kólik úshin beıimdelgen», dedi qala basshysy.Balabaqshamen qamtý – basty nazarda
Ákimniń aıtýynsha, byltyr 79 mektepke deıingi bilim berý mekemesi paıdalanýǵa tapsyrylǵan. Onyń 3-ýi – memlekettik balabaqsha, 44-i – jekemenshik, 32-si – shaǵyn ortalyq. 46 myńnan asa bala balabaqshamen qamtylǵan. 1 qańtardaǵy jaǵdaı boıynsha, mektepke deıingi bilim berý mekemelerine kezekte turǵandar sany – 33 240 bala. «Bıyl ákimdik memleket-jekemenshik áriptestigi sheńberinde 720 oryndyq 3 balabaqshany, 480 oryndyq 2 memlekettik balabaqshany paıdalanýǵa tapsyrady», degen Á.Isekeshev qańtar aıynan bastap mektepke deıingi bilim berý mekemelerine joldamalardy avtomatty túrde berý júıesin engizý jumystary júrip jatqanyn, jekemenshik balabaqshalarǵa joldamalar berý qanatqaqty rejimde iske qosylǵanyn aıtty. Ákim «Biryńǵaı medısınalyq aqparattyq Call-ortalyq» jobasy iske qosylǵanyn habarlady. «Bıyl bul qyzmet táýlik boıǵy jumys kestesine kóshti. Endi azamattar «103» biryńǵaı nómiri arqyly densaýlyq saqtaý boıynsha barlyq suraqtaryna jaýap alyp, dárigerge jazyla alady», dedi qala basshysy. Ol pasıenttiń biryńǵaı elektrondy medısınalyq kartasyn engizý jobasy qanatqaqty rejimde pysyqtalǵanyn da jetkizdi. Bul halyqqa kórsetiletin medısınalyq qyzmettiń sapasyn arttyrýǵa jáne kóptegen emhanalarda qaǵaz qujat aınalymyn alyp tastaýǵa múmkindik berdi. Á.Isekeshev halyqty baspanamen qamtýdyń ótkir máselelerin túsindirdi. 1 qańtardaǵy jaǵdaı boıynsha úı alý kezeginde 44 myń adam tur. Onyń 6 myńnan astamy ótken jyly tirkelgen. «Byltyr turǵyn úı baǵdarlamalary sheńberinde 603 páter berilgen. «Nurly jer» baǵdarlamasy aıasynda 2021 jylǵa deıin 40 myń páter tapsyrylmaq.«Ákim el ishin aralaýy kerek»
Eseptiń ekinshi bóliginde eki myńǵa tarta turǵyn ákimge alańdatqan máseleleri boıynsha suraqtaryn qoıdy. Osy sátte alǵash ret ákimdiktiń Feısbýk áleýmettik jelisindegi resmı paraqshasynda tikeleı onlaın-translıasııa júrdi. L.N.Gýmılev atyndaǵy Eýrazııa ulttyq jáne S.Seıfýllın atyndaǵy Qazaq agrotehnıkalyq ýnıversıtetteri bazalarynda ornatylǵan onlaın-baılanys arqyly júzden asa adam Á.Isekeshevke saýaldaryn joldady. Sonymen qatar, konsert zaldyń hollynda halyqpen keri baılanystyń tıimdiligin arttyrýǵa baǵyttalǵan «Belsendi azamat» aksııasy ótti. Buǵan qosa, turǵyndardan jazbasha ótinishter qabyldandy. Halyq negizinen PIK jumysy, baspanamen qamtý, densaýlyq saqtaý, bilim berý, kólik jáne ınfraqurylym boıynsha suraqtar qoıdy. Olar kótergen máseleler jaýapty qurylymdyq mekemelerdiń erekshe baqylaýyna alyndy, túsiniktemeler berilip, sheshý joldary qaraldy. Máselen, elorda turǵyndarynyń biri perzenthanadaǵy oryn tapshylyǵyn sóz etse, 75 jastaǵy astanalyq aqsaqal Á.Isekeshevke qala ishin aralap júrýdi daǵdyǵa aınaldyrýdy surady. Jaryssózde astanalyq áıel dári-dármektiń qymbattyǵyn aıtyp shaǵymdandy. «Ony múmkindigi shekteýli jandardyń satyp alýyna jaǵdaılary jete bermeıdi», degen oǵan bul másele qalalyq máslıhatta qaralyp jatqanyn jetkizdi. Jıyn barysynda ákimniń jumysyna oń baǵa bergender óz tilekterin de bildirip jatty. Ashat RAIQUL, «Egemen Qazaqstan» Sýretti túsirgen Erlan Omarov, «Egemen Qazaqstan»
