Ábden pisip-jetilgen másele edi

Ústimizdegi jyldyń 25 qańtary Qazaq eliniń tarıhyndaǵy eń aıtýly kúnderdiń biri boldy. Biz sol kúni Elbasynyń bılik tarmaqtary arasynda ókilettikterdi qaıta bólý máseleleri jónindegi Úndeýin teledıdar arqyly muqııat tyńdadyq. Shyn máninde bul – el ómirindegi aıryqsha eleýli mańyzy bar oqıǵa. Memleket basshysy óziniń Qazaqstan halqyna arnalǵan Úndeýinde: «Myqty prezıdenttik bılik memlekettiń qalyptasý kezeńinde aýyr belesterdi ótkerý úshin asa qajet boldy. Ol óz ýaqytynda ózin ózi aqtady. Bizdiń barlyq jetistikter osy júıeniń negizinde keldi», dep bılik tarmaqtaryn bólý barysynda 40-qa tarta prezıdenttik quzyrettiń Parlament pen Úkimetke beriletinin jarııa etti. Negizi, bul reforma basqarý júıesiniń tıimdiligin arttyrýǵa baǵyttalǵan. Ol eki baǵyt boıynsha júzege asyrylatyn bolady. Atap aıtqanda, Prezıdenttiń áleýmettik-ekonomıkalyq úderisterdi retteýdegi birqatar ókilettikteri Úkimetke jáne basqa da atqarýshy organdarǵa berilmek. Sonda bul salaǵa Úkimet, mınıstrlikter jáne ákimdikter tolyqtaı jaýap beretin bolady. Bul ózgeristerdi Úkimet qazirgi Parlament sessııasynyń aıaǵyna deıin engizýi tıis. Ekinshiden, odan da kúrdeli mindet – bılik tarmaqtary arasyndaǵy qarym-qatynasty konstıtýsııalyq deńgeıde teńgerimdi etý. Endigi jerde Úkimet qurýda Parlament rólin, mınıstrlerdiń depýtattar aldyn­daǵy jaýapkershiligin kúsheıtý asa mańyzdy. Parlamenttik saılaýda jeńiske jetken partııa Úkimet jasaqtaýda sheshimdi túrde áser ete alady. Osyǵan baılanysty, endi Úkimet ókilettigin burynǵydaı Prezıdent aldynda emes, Parlament aldynda toqtatýy zańdy bolady. Bizdińshe, Konstıtýsııa men zańdarǵa ishinara ózgeristerdiń engizilýi qoǵam men memlekettiń aldyndaǵy kóptegen túıtkildi máselelerdiń oń sheshilýine de yqpal etpek. Memlekettik bıliktiń tarmaqtary arasynda ókilettikterdi qaıta bólýdi qarastyrý el damýynyń júıeli jáne zańdy kezeńi ispetti. 25 jylda memleket boldyq, talaı jetistikterge jettik. Endi el damýynyń aldaǵy kezeńderin oılastyrǵan abzal. Úkimet pen mınıstrlikter memlekettik baǵdarlamalardyń oryndalýyna jaýapty bolsa, Parlament pen qoǵam sony qadaǵalýy tıis. Qazirgi zaman talaby osy. Jańa memleket, jańa qoǵam, jańa ekonomıka osyny talap etedi. Muny biz elimizde demokratııanyń tereńdetilýine batyl qadam jasalynýy, 5 ınstıtýttyq reforma, «100 naqty qadam» Ult josparynyń naqty is júzine asyryla bastaýy dep qabyldadyq. Qalaı bolǵanda da reformalar aıaqsyz qalmaýy tıis. Jalpy, Elbasy ókilettikterin bólý isin ábden pisip-jetilgen másele dep sanaımyz. Bul ózgerister memlekettiń keleshegi úshin mańyzdy. Oǵan biz bek senimdimiz. Almas MUHTAROV, «Ejelgi Taraz eskertkishteri» TMQM-nyń bólim basshysy TARAZ