Oqyrman jańalyǵyn jetkizedi
Benks barmaǵyn jalap otyr
Almaty oblysynyń Aqsý aýdanyndaǵy Sýyqsaı aýylyndaǵy «Edýard» sharýa qojalyǵynyń basshysy Nıkolaı Benkstiń ata-anasy da bal aralaryn ósirýmen aınalysqan bolatyn. Byltyr óz kásibiniń nátıjesin kórgen kásipker bal arasyn ósirýdi konveıerlik jolǵa qoıa otyryp, óz bıznesin keńeıtýdi uıǵardy. Buǵan deıin onyń 20 ara uıasy bolsa, «Bıznestiń jol kartasy-2020» memlekettik baǵdarlamasy boıynsha 3 mln teńge nesıe alǵan kásipker qosymsha 50 ara uıasyn omartasymen satyp alady. Sonymen birge bal quıatyn ydystar jáne basqa da qural-jabdyqtar alyp, óndiris pen ótkizý kólemin ulǵaıta otyryp 3500 keli ónim ótkizdi. Jaz aılaryndaǵy qarbalas kezeń mamyrdan tamyz aıyna deıin jalǵasady, odan keıin bal arasyn qosymsha qorektendire otyryp omartalardy qymtap, qysqy kezeńge ázirleý qamyna kirisedi. Eki jyl ishinde ol jeke adamdar men kásipkerler arasynan turaqty tutynýshylarmen jumys isteýge mashyqtanyp aldy. Zamanbek MUHAMETHANOV Almaty oblysy ...qýanyshyn bólisedi
Jurtshylyq tilegi oryndaldy
Birlik aýylynyń mektebine batyr jerlesimiz Jylbek Aǵadilovtyń atyn berý jóninde onomastıkalyq komıssııaǵa usynys túsirgen bolatynbyz. 2013 jyldyń sáýir aıynda mektepte ótken jıynda aýyl aqsaqaldary, aýdandyq bilim bólimi qyzmetkerlerimen bolǵan kezdesýde muǵalim Mansur Bazarov osyndaı oı bildirip, ony aýyl aqsaqaldary men ustazdary qoldady. Oblystyq «Saryarqa samaly» gazetinde Saıa Moldaıyp Jylbek Aǵadilov jaıly maqala jazyp, batyrdyń zıraty tozyńqyrap turǵany aıtylyp, oǵan Allabergen qajy bastaǵan aýyl aqsaqaldary qarajat jınastyryp, arnaıy tas belgi ornatty. Al aýdandyq tilderdi damytý bóliminiń qyzmetkeri Baýyrjan Adambekov batyr esimin mektepke berý jóninde respýblıkalyq onomastıkalyq komıssııaǵa qujattardy jınaqtap, birneshe ret Astana qalasyna is-saparmen baryp keldi. Aýyl aýdan ákimi Orazgeldi Qaıyrgeldınovpen kezdesýinde bul máseleni taǵy da kóterdi. Sóıtip, 2016 jyldyń qarasha aıynda Úkimet qaýlysy shyǵyp, bizdiń aýyldyń mektebi Jylbek Aǵadilov atyndaǵy jalpy orta bilim berý mektebi dep ataldy. Bul bizdiń aýyl úshin úlgi-ónegeli, kóp kókeıindegi ıgilikti sharanyń iske asqandyǵy dep bilemiz. Meıram QOJANOV, mektep dırektory Pavlodar oblysy, Baıanaýyl aýdany, Birlik aýyly
...qaýip etedi
«...Maǵan polkym emes, halqym kerek»
Rý – qazaqtyń shyqqan tegin tanytatyn tetik. «Tegin bilmegen túgin bilmeıdi» deıtinimiz sondyqtan. Osy rýdyń arqasynda qazaq álemdegi eń qany taza halyqtyń biri bolyp saqtalyp keledi. Bir rýdyń adamdary jeti ataǵa tolmasa qyz alysyp, qyz berispeıdi. Qazaqtyń tekti, talantty bolýynyń syry osydan bastaý alady. Qazaq óz rýyn bilgenmen, rýǵa bólinýshilikti quptamaǵan. «Birińdi qazaq, biriń dos, kórmeseń istiń bári bos» dep uly Abaı osyny meńzegen. Burynǵynyń shaldary «qaı balasyń» degende áke-sheshemizdiń aty-jónin aıtyp qutylatynbyz. Qazirgiler «qaı rýdan boldyń?» dep suraqty qabyrǵadan bir-aq qoıady. Jaýabyńdy jaqtyrmaı qalatyny da joq emes. Qazirgi tańda, nesin jasyraıyq, ulttyq namystan góri rýlyq namys áldeqaıda joǵary tur. Onyń ústine kúnshildik pen kórealmaýshylyqty qossańyz, rýshyldyqtyń oty laýlaı túsedi. Átteń, osy dertten aryla almaı-aq qoıdyq. Topyraqty ólimde, torqaly toıda toqaılasqan ár rýdyń adamdaryn kórip, Qudaıǵa shúkir deısiń. Biraq solardyń ishinde “bizdiń qazaqtyń balasy” dep emes, “bizdiń rýdyń balasy” dep maqtanatyndardy kórip ishiń ashıdy. Aqyn Jumataı Jaqypbaevtyń osy taqyrypqa qatysty óleńi bar. О́leńiniń sońy tómendegishe túıindeledi. «Rýlar – kóshpeldi eldiń polktary, Al maǵan polkym emes, halqym kerek». Olaı bolsa, búgingi óz «polkyn» asqaqtatqysy kelgendege aıtarymyz, rýǵa bólinýshilik – eldi rýhsyzdandyratynyn esten shyǵarmaıyq. Al bizge halqymyzdyń birligi qymbat. Mahambet SAPARMURATOV Ońtústik Qazaqstan oblysy, Maqtaaral aýdany ...senim artady
Ýkraın, orys sóıleıdi qazaq tilinde...
«Týǵan tilim – tirligiminiń aıǵaǵy» degen taqyrypta Mańǵystaý aýdandyq jastar ortalyǵy men «Jas Otan» jastar qanaty aýdandyq fılıaly jáne aýdandyq balalar kitaphanasynyń uıymdastyrýymen jastar ortalyǵynda shyǵarmashylyq jastar keshi ótti. Keshtiń maqsaty – aýdanymyzda turyp jatqan ártúrli ult ókilderiniń ana tilimizdi meńgerýin jastarǵa pash etý jáne ana tilimizdi asqaqtatyp jastar arasynda keńinen nasıhattaý. Sharaǵa eriktiler men jas otandyq jastar qatynasyp, Muhtar Áýezov, Ábdijámil Nurpeıisov, Muqaǵalı Maqataev sekildi aqyn-jazýshylardyń shyǵarmalaryn naqyshyna keltire oqydy. Basqosýda ýkraın qyz Elena Lostaveskaıa, qaraqalpaq ultynyń ókili Gúlaıym Nurotova, aýdandyq kitaphana meńgerýshisi Gúljamıla Qasymova, aýdandyq ishki saıasat jáne tilderdi damytý bóliminiń bas mamany Elmıra Aıtymanova, «Jas otan» jastar qanatynyń aýdandyq fılıal tóraǵasy Allabergen Qonarbaev sóz alyp, pikir bildirdi. Shara sońynda sharaǵa belsendi atsalysqan erikti jastar marapattaldy. Álına NURBERGENQYZY, Jastar ortalyǵynyń bas mamany Mańǵystaý oblysy, Mańǵystaý aýdany ...alǵys aıtady
Ajaldy arashalaǵandarǵa yqylasym bólek
«О́mir degen bir jarq etken naızaǵaı, О́mir degen kók aspannyń kúrkiri», – dep Muqaǵalı jyrlaǵandaı, ómir – taǵatsyz qozǵalys ispetti. О́mir – darııa. Darııada eskek esý ońaı ma? Darııanyń tuńǵıǵynan shyǵaryp, ólim men ómir beldesken shaqta dem berip, myna jaryq dúnıeni syılaǵan abzal jandar – Astana qalasyndaǵy №7 emhana dárigerleri. 2011 jyly Semeı qalasynda asa qaýipti ulǵaıǵan asqazan jarasyna ota jasalǵan. Professor Serikjan Botbaev, hırýrg Murathan Kúderbaevtyń biliktiligimen ota sátti ótti. Ota jasalǵannan beri Astanadaǵy №7 emhananyń №31 bólimshesiniń baqylaýyndamyn. «Densaýlyqtyń qadirin aýyrǵanda bilersiń» degendeı, syrqat syr bergende qol ushyn sozǵan gastroentorologııa bóliminiń dárigerleri Sara Temirbekqyzy, Almagúl Bazarova, azamattyq densaýlyq saqtaý isiniń úzdigi, revmatolog Baqyt Áýbákirova, Gúlsim Bolatbekova, Farıza Qulbekova, medbıke Sholpan Esenqyzy, oftalmolog Gúlnaz Jaqsybaeva, medbıke Gúlshat Tapaevaǵa alǵysymdy bildiremin. Márııa BEKTURTEGI, zeınetker, ustaz Shyǵys Qazaqstan oblysy, Besqaraǵaı aýdany
