Jumyr basty pendeni aldynda qandaı qıyn ótkelder men buralań joldar kútip turǵany bir Jaratqanǵa ǵana aıan. Sergeı segiz jyl buryn taǵdyr tálkegine ushyraımyn dep esh oılamaǵan. Qurylys ýchaskesinde eńbek etip, el qatarly nápaqasyn taýyp júrgen. Jazym degen aıaq astynan. Birde tehnıkalyq qaýipsizdik sharalarynyń saqtalmaýy saldarynan jumys ýchaskesinde óndiristik jaraqat alyp, aýyr halde aýrýhanaǵa jetkizilgen. Es-túsinen aıyrylyp, tósekte tańýly jatqan 27 jastaǵy tepse temir úzetin jigit qos aıaǵynyń kesilip, molaq bolyp qalǵanyn bilmegen. Keıin taǵy birneshe ota jasalyp, birinshi toptaǵy múgedekter qataryna qosylǵan. Buǵan deıin densaýlyǵyna kinárat artyp kórmegen ol úshin endi azapqa toly kúnder men túnder bastalǵan. Tán jaraqaty jazylar-aý, jan jarasynan qalaı saýyǵarmyn degen saryýaıymǵa salynǵanda ómirden kúder úzip ketetin. Erteńge degen senimsizdik tula boıyn tumshalap, oıyn áldebir qorqynysh sezim bıleıtin. Týǵan-týystary, dostary sabyrǵa shaqyryp, qansha basý aıtqanmen, kúırektikke salynyp, sál nársege shyny sııaqty shytynap shyǵa keletin. О́zi sııaqty bir beıbaqty kezdestirip, aqyl-keńesine qulaq túrmegende bordaı ezilip, júndeı tútilip júre berer me edi. Taǵdyrlasy «Meni kórmeısiń be? Eki aıaǵym, bir qolym joq bolsa da, masyl bolǵan emespin. Bireýge kiriptar bolýdan asqan qorlyq joq. Eńseńdi kóter. Esińdi jı. О́z kúshińe sen. Áli jassyń. Kórer qyzyǵyń alda», dep jiger bere sóılep, júrek túkpirindegi syryn jaıyp salǵan. Sóıtse, ol bastapqyda basqa túsken beınetke shydaı almaı, ishkilikke áýes bolypty. Tek jeke basynyń qajyr-qaıraty, alǵa qoıǵan maqsat-muratyna umtylýdyń arqasynda qoǵamdyq ortaǵa qaıta oralypty.
Osyndaı qaıraý sózderden keıin Sergeıdiń kóńili kóterilip, ózin ózgeshe keıipke túskendeı sezindi. Qolarbada tańylyp otyra bergenshe múmkindigi shekteýli adamdardyń qolynan da is keletinin dáleldeıin degen oı qanat bitirip, tomaǵasyn sypyrǵan qyran qussha dúr silkindi. Alaıda, mekeme-uıymdardyń tabaldyryǵyn tozdyrǵanmen, eshkim qushaq jaıa qarsy ala qoımady. Qaı esikti qaqsa da, «bos jumys orny joq!» degen áńgime keltesinen qaıyrylady. Keıbireýlerdiń aıaýshylyq, músirkeýshilik bildirgenin, baz bireýlerdiń osyǵan ne kerek degendeı oqty kózben ata qaraǵanyn sezse de, syr bildirmedi. Birde beldi bekem býyp, táýekel etti. Qolónermen bala kezinen aınalysyp, qyr-syryn meńgerip alǵany osy joly kádege asty. Aǵa-inileriniń kómegimen úıdiń janyndaǵy saraıdy bosatyp, ustahanaǵa aınaldyrdy. Sodan aǵashtan neshe túrli buıymdar jasaýǵa bar ynta-jigerimen kirisip ketti. Ádepkide aýyr oıdan arylýdyń, ýaqyt ótkizýdiń ermegine sanasa, keıin shyǵarmashylyq qarym-qabiletine ushqyr qııal qosylyp, kóz jaýyn alar, ádemi, áshekeıli ónimder sórelerden oryn ala bastady. Kórshileri men tanystary japatarmaǵaı satyp alyp, qosymsha tapsyrys túse bastaǵanyn kórip, taǵy bir sheshimge keldi. Ondaǵy oıy – ustahana aýqymyn keńeıtý, usaq-túıek isterden góri kúrdelisine aýysý. «Damý» qorynyń aımaqtyq fılıaly arqyly qaıtarymsyz grant alýǵa bekindi. Múmkindigi shekteýli jandardy qoldaýǵa baǵyttalǵan arnaıy baǵdarlama aıasynda kásipkerlik salasyn keńeıtsem degen ishki túısik alǵa jeteledi. Mekemeniń menedjerleri shaǵyn kásipkerlik retinde tirkelip, qajetti qujattardy jınap ákelýge keńes berdi. Aıtqan tapsyrmalardy tap-tuınaqtaı oryndap, «Damý-Kómek» baǵdarlamasyna qatysý múmkindigine ıe bolǵanda tóbesi kókke jetkendeı qýandy. «Juldyzdarǵa qara» jobasynyń qaıyrymdylyq qory arqyly 300 myń teńge qarajat aldy. Sanaýlylardyń qataryna iligýin ózine kórsetilgen senim, qurmet dep túsindi. Qoǵamǵa kerek ekenin uǵyndy.
Qaıtarymsyz grantqa úsh stanok satyp alyp, qustyń uıasyndaı tar jerge ornalastyrýǵa týra keldi. О́nimniń túrleri kóbeıip, sapasy jaqsaryp, jurtshylyq tarapynan suranys kóptep túse bastady. Aǵashtan túıin túıgen sheber ótinish aıta kelgen eshkimniń qolyn qaqqan emes. Kez kelgen tapsyrysty qabyldap, sapaly etip oryndap beredi. Aldaǵy maqsaty – úı jıhazdaryn jóndeý men jasaýǵa arnalǵan kásibin ashyp, ózi sııaqty taǵdyrdyń aýyr taýqymetine ushyraǵan adamdardy jumyspen qamtý. Átteń, úı janyndaǵy sheberhana tar.
– Orynjaı máselesi sheshilse, qalǵan sharýalardy ózim-aq tyndyrar edim. Ekinshi deńgeıli bankterden nesıe alý qıyn, talap-sharty kúshti. Biz sııaqty múgedekter túgili saý adamdardyń taýany shaǵylyp jatady. Ekinshiden, múmkindigi shekteýli kásipkerler shyǵaratyn ónimderdi satatyn saýda núkteleri joq. Almatyda ǵana arnaıy dúken jumys isteıdi. Meni osy sanattaǵy jastardyń basyn biriktirip otyrǵan «Qamqor», «Ardos júrek» sııaqty jergilikti qoǵamdyq birlestikterdiń tirshiligi qyzyqtyrady. Olardyń atqaryp jatqan is-áreketterine qoldaý jasalyp jatqany qýantady, – deıdi bizben oı bólisken Sergeı Sapko.
Sergeı bolashaqqa úlken úmitpen qaraıdy. Oblys ákiminiń qabyldaýynda aıtqan usynys-oılary qoldaý taýyp, tıisti mekemeler sheberge keńirek oryn izdestirip jatqan kórinedi. «Damý» qoryna taǵy da qatysyp, baǵyn synap kórmek.
Eki aıaǵy joq bolsa da, qalaı eńbek etýdiń úlgi-ónegesin kórsetip kele jatqan qaısar jannyń armany oryndalaryna seneıik.
О́mir ESQALI,
«Egemen Qazaqstan»
PETROPAVL
