«Kók kıt» kóp til biletin sııaqty

Ońtústik Qazaqstan oblysynda úsh mıllıonǵa jýyq halyq tursa, negizin jergilikti ult quraıdy. Oblystyń birqatar aýdandarynda ózge ulttyń ókilderin emge izdeseńiz de tappaısyz. Reseıde «Kók kıt» degen soıqan oıyn bastalǵanda bir áriptesimiz áleý­mettik jelige «Kók kıt» oryssha bilmeıtinderge qorqynyshty emes eken» dep ázildep jazǵan. Olaı emes eken. Talaı jasóspirimdi azdaǵan ýaqyttyń ishinde ózine qol jumsaýǵa aparǵan jantúrshigerlik oıyn Ońtústik jastaryna da jetipti. Jaqynda qalalyq bilim basshylyǵy men ata-analar jıynynda oblys prokýrory birinshi orynbasarynyń mindetin atqarýshy Halı Mamataev mynadaı derek keltirdi. Sońǵy bir aptada 8 jasóspirim men kámelet jasyna tolǵan bir turǵynnyń týystary ishki ister organdaryna kómek surap, aryzdanǵanyn aıtty. Olardyń aıtýynsha, balalaryna túnde belgisiz bireýler qońyraý shalyp, «Kók kıt» oıynyn oınaýǵa úgittegen. – Bizge belgili bolǵandaı, jasós­pirimderdiń uıaly telefondaryna qońyraý shalyp, olardy qorqytyp, oıynǵa úgittegender qa­zaq tilinde habar­lasqan. Olarǵa «oınamasań seniń ápkeńdi, aǵańdy ne bolmasa basqa da týysyńdy óltirip ketemiz» dep qorqytqan. Osyǵan oraı, oblystyq Ishki ister departamentiniń bilikti mamandarynan arnaıy top quryldy. Habarlasqandardy izdestirý sharalary júrgizilip jatyr. Sondaı-aq, atalmysh 9 derek boıynsha QR Qylmystyq Kodeksiniń 105-baby 3-tarmaǵymen is qozǵalyp, tergeý amaldary júrgizilýde. Osy jerde taǵy bir eskerte ketetin másele, kúdikti tulǵalardyń kinálary dáleldense, olar 3 jyldan 7 jylǵa deıin bas bostandyqtarynan aıyrylady. Mundaı áreketterge jol bergender qatań jazalanady, – dedi ol. Ata-analar men bilim bóliminiń basshylary bas qosqan jıynda saqtyq sharalary jaıynda usynystar aıtyldy. Solardyń biri – jasóspirimderdiń qolyndaǵy qym­bat smartfondardy qarapaıym baılanys quraldaryna aýystyrý. Bilim bóliminiń basshylary da osy usynysty qoldap otyr. Endi mektepte jas jetkinshekterge smartfon ustaýǵa tyıym salynady. Bul bir jaǵynan balanyń quqyn shekteý sııaqty kóringenimen, olardyń ómirin saqtap qalýdan mańyzdy emes. Smartfondy tárkileý bar máseleni sheshpeıdi. Endigi másele, ata-analar men ustazdardyń jıi bas qosyp, osy indetpen kúresýde júıeli jumys júrgize alýynda bolyp otyr. Baqtııar TAIJAN, «Egemen Qazaqstan»