2017 jyly Qazaqstanda 4 saılaý ótedi

Elordada Ortalyq saılaý komıssııasynyń tóraǵasy Berik Imashevtiń jetekshiligimen vedovstvonyń ashyq otyrysy ótti. Oblystyq, Astana jáne Almaty qalalyq saılaý komıssııalarynyń tóraǵalary men hatshylary, Joǵarǵy Sot, Bas prokýratýra, Ádilet, Aqparat jáne kommýnıkasııalar, Bilim jáne ǵylym, Ishki ister, Syrtqy ister mınıstrlikteriniń ókilderi qatysqan jıynda Ortsaılaýkomnyń ótken jylǵy jumysy qorytyndylanyp, 2017 jylǵa arnalǵan jumys jospary naqtylandy. Kirispe sóz alǵan Komıssııa tóraǵasy Memleket basshysy N.Nazarbaev usynǵan konstıtýsııalyq reforma saılaý organdarynyń qyzmetine úlken jaýapkershilik júkteıtinin atap ótip, mundaı qadam eldiń saıası júıesin demokratııalandyrý men konstıtýsııalyq qurylysty nyǵaıtý jolyndaǵy mańyzdy qadam ekendigin atap ótti. Sondaı-aq, alqa otyrysynda aǵymdaǵy jylda elimizde 4 saılaý naýqany ótetindigi málimdeldi. «Bıyldyń ózinde-aq biz 4 saılaý naýqanyn uıymdastyryp, ótkizýimiz qajet. Onyń alǵashqysy osy kúnderi bastalyp ta ketti. Iаǵnı, qazirgi kezde shyǵyp qalǵan máslıhat depýtattarynyń ornyna kandıdattardy usyný respýblıka boıynsha 58 saılaý ýchaskesinde ótýde. Al saılaý 26 mamyrda ótedi dep josparlanǵan. Sodan kóp keshiktirilmeı 30 maýsymda 2011 jyldyń 19 tamyzynda saılanǵan Senat depýtattarynyń ornyna kezekti saılaý ótkizilýi tıis. Úshinshi naýqan retinde aýyl okrýgteriniń quramyna kirmeıtin, Qazaqstan Respýblıkasynyń aýdandyq mańyzdaǵy qalalary, aýyldyq okrýgteri, eldi mekenderi men aýyldary ákimderiniń kezekti saılaýyn ótkizý oıymyzda bar. Jáne sońǵysy shyǵyp qalǵan máslıhat depýtattarynyń ornyna saılaý ótkizý 29 qazanǵa josparlanǵan», – dedi B.Imashev. Otyrysta ótken jyly atqarylǵan sharýalar men 2017 jylǵy saılaýlardy zańdyq jáne qarjylyq qamtamasyz etý máselelerine qatysty arnaıy baıandama jasaǵan OSK tóraǵasynyń orynbasary Vladımır Foos senatorlardy saılaý tártibi týrasynda keńirek toqtalyp ótti. Onyń aıtýynsha, árbir oblys pen Astana jáne Almaty qalasynan saılanatyn Senat depýtatynyń jalpy sany 16 bolady jáne joǵaryda atap ótken 58 ýchaskeniń 13 oblystyq, 9 qalalyq jáne 36 aýdandyq máslıhat deńgeıindegi saılaý ýchaskeleri bolyp tabylady eken. Alqaly jıynda Komıssııa hatshysy B.Meldeshov pen Ortsaılaýkom múshesi S.Mustafına, K.Petrov, M.Sársembaev pen L. Súleımen baıandama jasap, vedomstvonyń aldaǵy jumysynyń basymdyqtary aıqyndaldy. Sonymen qatar, naqty baǵyttar boıynsha qyzmetti uıymdastyrýdyń jańa nysandary men ádister-tásilderi talqylandy. Sóz sóıleý barysynda qozǵalǵan taqyryptar arasynda saılaý prosesine qatysýshylardy oqytý, saılaýshylar tizimderin qurý, aýmaqtyq saılaý komıssııalarymen belsendi ózara is-qımyldy qamtamasyz etý syndy ózekti máselelerge erekshe kóńil bólindi. Nurlybek DOSYBAI, «Egemen Qazaqstan»