Boksshy Bekman Soılybaevtyń kelesi qarsylasy belgili boldy

WBC nusqasy boıynsha Eýrazııa jáne WBA NABA tujyrymynyń chempıony qazaqstandyq boksshy Bekman Soılybaevtyń kelesi qarsylasy belgili boldy. Bul týraly diamondring.kz habarlady. Soılybaevtyń kelesi qarsylasy 31 jastaǵy tájirıbeli meksıkalyq boksshy Marıo Antonıo Masıas atandy. Ol sharshy alańda 50 jekpe-jek ótkizip, 28-in jeńispen aıaqtaǵan. Qos boksshynyń arasyndaǵy aıqas 8 raýndtyq júıe boıynsha 10 naýryz kúni AQSh-tyń Kalıfornııa shtatyndaǵy Týstın qalasynda ótedi. «Sharshy alańǵa shyǵatynym úshin qýanyshtymyn. Sońǵy ret jekpe-jegimdi ótken jyly ótkizgendikten, bul sátti uzaq kúttim. Bir ókinishtisi, qolymnan alǵan jaraqatyma baılanysty birazǵa deıin jattyǵý jasaı almadym. Al qazir jankúıerlerimdi jeńispen qýantýǵa daıynmyn. Qarsylasym tájirıbeli ekeni aıtpasa da belgili. Álem chempıony ataǵyna úmitker bolǵan. Degenmen, bapkerim Erık Braýn ekeýimiz onyń osal tustaryn taýyp, jeńiske jetemiz dep otyrmyz. Qazir 10 naýryzdy asyǵa kútip júrmin», – deıdi Bekman Soılybaev. Aıta keteıik, 2011 jyldyń jeltoqsan aıynda Marıo Masıas jeńil salmaqta WBA nusqasynyń chempıondyq belbeýi úshin sharshy alańǵa shyqqan, al 2014 jyly WBC tujyrymy boıynshy chempıondyq ataqqa mindetti qarsylas retinde aıqasqan. Alaıda, eki kezdesýde de meksıkalyq boksshy jankúıerlerin qýanta almady. Qazirgi ýaqytta Bekman Soılybaev Los-Andjeles qalasynda Wild Card West jattyǵý zalynda amerıkalyq bapker Erık Braýnmen birge jattyǵý jasap júr. Otandasymyz kásipqoı boksta 9 kezdesý ótkizip, bárinde jeńiske jetken. Onyń tórteýin nokaýtpen aıaqtaǵan. Aldyn ala málimet boıynsha onynshy aıqasy bıyl sáýir aıyna josparlanyp otyr.