Dúnıejúzilik boks serııasy: Zakır Safıýllın ózbek boksshysynan basym tústi

Taldyqorǵan qalasynda ótip jatqan Dúnıejúzilik boks serııasynda (WSB) qazaqstandyq «Astana Arlans» pen ózbekstandyq «Ozbek tigers» komandalary qolǵap túıistirdi. Sharshy alańǵa ekinshi bolyp qazaqstandyq Zakır Safıýllın men ózbek boksshysy Mýrodjan Ahmadalıev shyqty. Kezdesýdiń biirinshi raýndynda Mýrodjan Ahmadalıev jabyq oıyn kórsetti. Otandasymyz negizinen alǵa umtylýmen boldy. Degenmen, ózbek boksshysy urymtal tustarda soqqylaryn baǵyttap qalýǵa tyrysyp baqty. Kezdesýdiń ekinshi raýndynda Mýrodjan qatelikterin toltyryp, shabýyldamaq bolǵan. Biraq Zakırdiń mysy basyp, ózbekstandyqtyń josparyn júzege asyrýyna múmkindik bermedi. Úshinshi raýnd ta dál osy baǵytta órbidi. Jerlesimiz qarsylasyn qorǵanystan shyǵarmaı tómpeshteýmen boldy. Ara-tura qarsy soqqylarmen baǵyttaǵanmen, basymdyqqa ıe bolmady. Degenmen, tóreshilerdiń ekeýi raýnd qorytyndysynda ózbekstandyqty jeńiske laıyq dep eseptegen eken. Tórtinshi raýndta qos sportshy ashyq boksqa shyqty. Biraq otandasymyzdyń mańdaıyna, qabyrǵasyna baǵyttaǵan soqqylarynan ózbekstandyq boksshy eseńgirep qalatyndaı kórindi. Sońǵy úsh mınýtta da Safıýllın dóp soqqylary basym boldy. Mýrodjan tipti, tizerlep qulaǵanmen, tóreshi ony esepke almady. Qorytyndysynda rıng ıesi Zakır Safıýllın jeńiske jetti.