«Astana Arlandary» ózbek boksshylarynan basym tústi

Taldyqorǵan qalasynda Dúnıejúzilik boks serııasy (WSB) aıasynda qazaqstandyq «Astana Arlans» pen ózbekstandyq «Ozbek Tigers» boksshylary jekpe-jek ótkizdi. Bul keshte jerlesterimiz 4:1 esebimen basym tústi. Alǵash bolyp rıngke 52 kılo salmaqta Oljas Sáttibaev pen Abrorjan Kodırov shyqty. Otandasymyzdyń tegeýrinine ózbek boksshysy tótep bere almady. Nátıjesinde Sáttibaev jeńiske jetti. Ekinshi bolyp sharshy alańǵa 60 kıloda qazaqstandyq Zakır Safıýllın men ózbekstandyq Mýrodjan Ahmadalıev shyqty. Jerlesimiz de Oljas Sáttibaevtyń jolyn jalǵap, qarsylasynan basym tústi. Úshinshi bolyp 69 kıloda Aslanbek Shymbergenov pen Shahram Gııasov kúsh synasty. Jankúıerler naǵyz jan alysyp, jan berisken kezdesýdiń kýási boldy. Alǵashqy eki raýndta ózbek boksshysy jeńiske jetkenmen, kelesi alty mınýtta Shymbergenov basym boldy. Al qorytyndy besinshi raýndta tóreshiler otandasymyzdyń belsendiligine oń baǵa berip, jeńiske laıyq dep tanydy. Budan keıin rıngte 81 kıloda Nurdáýlet Jarmanov pen Bektemir Melıkýzıevtiń aıqasy ótti. О́kinishke oraı, Nurdáýlettiń súreńsiz óneri qazaqstandyqtardyń alǵashqy jeńilisine sebep boldy. Sońǵy bolyp asa aýyr salmaqta Qamshybek Qońqabaev pen Bahodır Jalolov shyqty. Bul synda otandasymyzdyń adýyndy shabýyldaryna ózbek sportshysy qarsylyq tanyta almady. Osylaısha, sońǵy jekpe-jek te qazaq boksshysynyń jeńisimen aıaqtaldy.