Qazaqstan sýretshiler odaǵynyń múshesi Georgıı Sokov alýan janrda jáne túrli tehnıkamen jumys isteıtin qylqalam sheberi. Ol peızaj janryna kóp qalam tartpaǵanyn aıtsa da, osydan shamaly ýaqyt buryn kórermenderine plenerlik jumystaryn usynǵan bolatyn. Endi ol qostanaılyqtarǵa grafıkalyq shyǵarmalaryn tartý etti. Kórmeni sýretshi «Aq pen qara» dep atapty. Ol kórmeniń ashylý saltanatynda «Aq pen qaranyń» mánisin túsindirip ótti.
– Men bul joly tek grafıkalyq jumystarymdy kórsetýdi maqsat ettim. О́ıtkeni, bizdiń kórermender kórkemsýret óneriniń altyn ordasyna balaıtyn maıly boıaýdy, keskindemeni jaqyn tutady, al grafıkaǵa kóńil bólmeıdi. Men osy túsinikti joqqa shyǵarǵym keldi. О́ner bir janrdan jáne biryńǵaılyqtan turmaýy tıis. Ár janrdyń, tehnıkanyń aıtary, keremettigi bolýy kerek. Men aq qaǵaz, qara qalammen de kóp dúnıe aıtylatynyna kórermen nazaryn aýdarǵym keldi, – dedi Georgıı Mıhaılovıch.
Sýretshiniń 20 jyl ishinde salǵan seksennen asa grafıkalyq shyǵarmalary mazmuny jaǵynan da san alýan. Ol álem jáne orys klassıkalyq ádebıeti shyǵarmalary keıipkerlerin biraz grafıkalyq eńbekterine arqaý etken. Mysaly, «Ronsardyń óleńderine» lınonaqysh toptamasy, A.Pýshkın men M.Býlgakovtyń tanymal týyndylaryna arnalǵan paraqtar sonyń aıǵaǵy. Sonymen qatar, grafıkalyq týyndylar sıýjetterinde dala salt attylary taqyryby da sýretshi qııalynan tys qalmaǵan.
– Grafıkalyq jumystar kóp ter tógýdi qajet etedi. Qazir sýretshiler ondaı jumysqa bara bermeıdi. Georgıı Mıhaılovıch sekildi qylqalam óneriniń eńbek torylary ǵana oǵan erinbeıdi. Kartınalary birinen biri ótedi, kórermender tańdanysyn jasyra almaı tur, – deıdi sýretshiniń áriptesi Tatıana Izıýmova.
Georgıı Mıhaılovıchtiń aıtýynsha, onyń grafıkalyq jumystary sýretshi retindegi izdenisteriniń de nátıjesi. Eń bastysy, sýretshi qylqalam arqyly oı aıtýy kerek qoı. Alýan tústi paıdalanatyn keskindeme ómir aqıqatyna jaqyn, al aq pen qaradan ǵana turatyn grafıka óziniń shekteýli múmkindigi sekildi ómirdegi shartty túsinikterdi berýge qolaıly. Sýretshini grafıkalyq jumystarǵa jetelegen sebeptiń biri de osy eken. Onyń eńbekterindegi joǵary oryndaý mádenıetin, baı qııal, mánerlilik, aq pen qara tústerdiń kereǵarlyǵyn utymdy paıdalanýdy áriptesteri de, kórermender de erekshe baǵalady.
Názıra JÁRIMBETOVA, «Egemen Qazaqstan»
QOSTANAI
