Jeke tulǵalardyń qujattary – anyqtamalyqta

Qazaqstan Respýblıkasy Prezıdentiniń Arhıvi Ulttyq arhıv qorynyń qujattary arqyly qazaqstandyq tarıhty tanymal etýge baǵyttalǵan is-sharalar sheńberinde jáne «Birtektilik pen birlik» reformasyna saı «100 naqty qadam» Ult josparynyń 87-qadamyn júzege asyrýǵa arnalǵan «Jeke tektik arhıv qorlary boıynsha anyqtamalyq» kitabynyń tusaýkeserin ótkizdi. Tarıh pen taǵylymǵa toly anyqtamalyq kitaptyń lentasyn aqıyq aqyn Ilııas Jansúgirovtiń balasy Saıat Jansúgirov qıdy. Anyqtamalyqta sırek jáne biregeı arhıvtik qujattar kórinis tapqan, qurastyrýshylar belgili adamdardyń ómiri arqyly el tarıhyn aıqyndaýdy murat tutqan. Jeke tulǵalardyń arhıvteri óz kózimen kórgen, ózderi belsene qatysqan oqıǵalardy keńinen sıpattaıdy. Bul qujattar ótken ýaqyttyń oqıǵalaryn, ahýalyn sezinýge, el tarıhyn tereń tanýǵa múmkindik beredi. Jeke tektik qujattardyń qaı-qaısysy da qundy, sol sebepti ol zertteýshiler qyzyǵýshylyǵyn týǵyzary sózsiz. Qazaqstan Respýblıkasy Prezıdentiniń Arhıvi Qazaqstannyń belgili memleket jáne qoǵam qaı­rat­kerleriniń jeke arhıvterin qabyldaýdy 1998 jy­ly bastaǵan bolatyn. Qazirgi kúni memlekettik saqtaýda 82 jeke tektik qor bar, onyń ishinde Qasym-Jomart Toqaevtyń, Saǵı Jıenbaevtyń, О́zbekáli Jánibekovtiń, Marat Ospanovtyń, Ánýar Álimjanovtyń, Manash Qozybaevtyń, Mıhaıl Esenálıevtiń, Asanbaı Asqarovtyń, basqa da kórnekti memleket jáne qoǵam qaıratkerleriniń qorlary jınaqtalǵan. Anyqtamalyq Qazaqstan tarıhyna qyzyǵatyn, ómirbaıandyq zertteýlermen aınalysatyn oqyrman qaýymyna arnalǵan. Anyqtamalyqtyń tusaýkeserimen birge tarıhı-qujattyq kórme de uıymdastyrylyp, onda jeke qorlar men toptamalardan alynǵan qoljazbalar, kúndelikter, ǵylymı jáne shyǵarmashylyq eńbekter, fotosýretter kórsetildi. Tusaýkeserge qadirli qonaq retinde anyqtamalyqta jeke qorlary týraly baıandalǵan belgili qoǵam qaıratkerleri men olardyń týystary qatysty. Aıgúl AHANBAIQYZY, «Egemen Qazaqstan» ALMATY