Joldaý júktegen mindetter talqylandy

Búgin Ońtústik Qazaqstan oblysyna arnaıy issaparmen kelgen QR Premer-mınıstriniń orynbasary – Aýyl sharýashylyǵy mınıstri Asqar Myrzahmetov «Nur Otan» partııasynyń oblystyq fılıalynda Ońtústik jurtshylyǵymen kezdesip, Elbasy Nursultan Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýynyń Úkimet aldyna qoıyp otyrǵan mindetterin baıandady. Jıyndy ashqan oblys ákimi-«Nur Otan» partııasy OQOF tóraǵasy Janseıit Túımebaev osynaý strategııalyq qujattyń memlekettiń órkendeýine negiz bolatynyn aıtyp, aımaqtyń damýyna jol ashatyn basymdyqtaryna toqtaldy. «Memleket basshysynyń Qazaqstandy damytýdyń Úshinshi jańǵyrýy boıynsha jasaǵan Joldaýy álemdik daǵdarys kezinde alǵa batyl qadam basýǵa baǵyttaıtyn saıası qujat bolyp tabylady. Atap aıtqanda, biz eldiń jahandyq básekege qabilettiligin qamtamasyz etetin ekonomıkalyq ósimniń jańa modelin qurýymyz qajet. Osy maqsatta Elbasy bes negizgi basymdyqty aıqyndady. Olar ekonomıkanyń álemdik ósiminiń orta deńgeıden joǵary qarqynyn qamtamasyz etýge jáne 30 ozyq eldiń qataryna qaraı turaqty túrde ilgerileýge negizdelgen», - dedi oblys basshysy  Janseıit Túımebaev. Bıylǵy joldaý el ekonomıkasyn nyǵaıtýmen qatar, halyqtyń ál-aýqatyn jasqartý boıynsha jańa mindetter júkteıtinin tilge tıek etken Premer-mınıstrdiń orynbasary – Aýyl sharýashylyǵy mınıstri Asqar Myrzahmetov bul Joldaýdyń jyldaǵydan erekshe ekendigine toqtalyp, onyń elimizdiń ekonomıkalyq damýyndaǵy turaqtylyqty qamtamasyz etýde basty baǵdar ekenin jetkizdi. «Prezıdenttiń árbir Joldaýy – elimiz úshin mańyzdy ekendigi belgili. Joldaýlar bir jaǵynan halyqtyń kúndelikti tynys-tirshiligine qatysty bolsa, ekinshi jaǵynan strategııalyq turǵydan sıpattalyp otyrady. Ol Úkimetke aıqyn baǵdarlar beredi. Sonymen birge, Joldaýdyń jalpy qoǵamǵa da, árbir azamatqa da arnalatyndyǵy belgili», - dedi mınıstr. Vıse-premerdiń aıtýynsha, Qazaqstandy Úshinshi jańǵyrtý jónindegi mindetterge qol jetkizý úshin Prezıdent 5 negizgi basymdyqty, atap aıtqanda, ekonomıkanyń jedeldetilgen tehnologııalyq jańǵyrtylýy, bıznestik ortany túbegeıli jaqsartý jáne keńeıtý, makroekonomıkalyq turaqtylyq, adamı kapıtal sapasyn jaqsartý, ınstıtýsıonaldyq ózgerister, qaýipsizdik jáne sybaılas jemqorlyqpen kúres basymdyqtaryn usynyp otyr. Sondaı-aq, jıyn barysynda Asqar Isabekuly Memleket basshysynyń agroónerkásipti damytý aıasyndaǵy tapsyrmasyna oraı, Aýyl sharýashylyǵy mınıstrliginiń aldaǵy mindetterin de baıandady.