Tarazda balalardy damytý ortalyqtary ashyldy

Taraz memlekettik pedagogıkalyq ınstıtýtynda «О́zin-ózi taný» men «Balalardyń tilin damytýda korreksııalyq qoldaý kórsetý» ortalyqtary ashyldy. Onyń ashylý rásimine QR Bilim jáne ǵylym vıse-mınıstri Elmıra Sýhanberdıeva qatysty, dep habarlaıdy oqý ornynyń resmı ókili Jandar Asan. Ortalyqta sóıleý qabiletiniń kemistigi bar jetkinshekter oqyp, tárbıelenbek. Bunda defektolog mamandar sábılerge jan-jaqty pedagogıkalyq, fızıologııalyq jáne psıhologııalyq zertteýler jasap, kemistikti túzeý baǵytynda jumys atqarady. Sonymen qatar, pedagogıkalyq oqý ornynyń 3-4 kýrs stýdentteri ustaz-logoped retinde tájirıbe júrgize alady. «Elimizdiń mektepterinde osy taqilettes ortalyqtar birtindep ashylýda. Dese de Taraz memlekettik pedagogıkalyq ınstıtýty joǵary oqý oryndary arasynda alǵash bastama kóterip, ony naqty júzege asyryp otyr. Instıtýttyń Arnaıy pedagogıka kafedrasy bilim berý baǵdarlamasy aıasynda «Defektologııa» mamandyǵy boıynsha bolashaq logopedterdi daıarlaý ústinde. Bunyń jańa mamandyq retinde engizilgenine kóp bola qoıǵan joq. Osydan-aq, onyń qazirgi órkenıetti zamanda óte tapshy ekenin ańǵarýǵa bolady. Sondyqtan, bolashaq mamandardyń bilim men tájirıbeni qatar alýyna múmkindik jasaǵany úshin pedagogıkalyq ınstıtýttyń ujymyna alǵys bildiremiz,» – dep atap ótti Elmıra Sýhanberdıeva. Ol aldaǵy ýaqytta atalǵan salaǵa kadr daıarlaý úshin memlekettik bilim berý granttarynyń kóbirek bólinetindigin málimdedi. Resmı málimetterge súıener bolsaq, búginde Taraz qalasynda 2 arnaıy logopedııalyq balabaqsha jumys isteıdi. Al, ózge mektepke deıingi bilim berý mekemelerinde arnaıy logopýnkter deńgeıinde qyzmet kórsetedi. Osyǵan oraı, óńirde logopedterge suranys barlyǵy baıqalady. «Qazirgi tańda balalar arasynda til kemistigi patologııasy jıi ushyrasady. Oqý orny osy olqylyqtyń ornyn toltyrýdy kózdep otyr. Jumysyn jańadan bastaǵaly otyrǵan ortalyqqa qazirdiń ózinde tirkelgen búldirshinder barshylyq. Ortalyq 4-8 jas aralyǵyndaǵy 50 shaqty tárbıelenýshini qabyldaýǵa qaýqarly. Bilikti mamandar arnaıy pedagogıkalyq avtorlyq baǵdarlamalar arqyly zamanaýı ádis-tásildermen jumys isteıtin bolady. Elimiz órkenıetti qoǵam qurýy úshin deni saý, tárbıeli azamattardyń qatary kóp bolǵany abzal. Atalǵan ortalyq osy maqsatta jumys atqarmaq,» – dedi ınstıtýt rektory Darııa Qojamjarova. Sonymen qatar, ınstıtýtta «О́zin-ózi taný» ortalyǵy paıdalanýǵa berildi. Ortalyqta shet tilderin úırenýge bolady. Shyǵarmashylyqty damytý úıirmeleri de bar. Atap aıtqanda, jastar teatrlandyrylǵan qoıylymdarǵa qatysyp, músin jasaý, kesteleý ónerine mashyqtanady. Dáristerdi pedagogıkalyq oqý ornynyń ustazdary júrgizedi.