Elbasy qaza tapqan jaýyngerlerdiń otbasyna kóńil aıtty

Memleket basshysynyń tóraǵalyǵymen Qaýipsizdik keńesiniń otyrysy ótti, dep habarlaıdy Aqordanyń baspasóz qyzmeti. Otyrysty ashqan Nursultan Nazarbaev áskerı jattyǵý barysynda qaza tapqan 7 áskerı qyzmetkerdiń týystary men jaqyndaryna barsha Qazaqstan halqynyń jáne jeke óziniń atynan kóńil aıtty. – Jambyl oblysynda qar kóshkini saldarynan bolǵan qaıǵyly oqıǵa týraly habardy zor kúızelispen qabyldadym. Olardyń árqaısysy eliniń naǵyz patrıoty bolyp, óz áskerı mindetin sońyna deıin atqardy. Qorǵanys mınıstrligine qaza tapqan sarbazdardyń otbasylarynyń bárine jan-jaqty kómek pen qoldaý kórsetýdi tapsyramyn. Memlekettik komıssııa bolǵan oqıǵanyń sebepterin anyqtaýda. Mundaı qaıǵyly jaǵdaı bolashaqta qaıtalanbaý úshin barlyq qajetti sharalardy qabyldaımyz, – dedi Qazaqstan Prezıdenti. Qaýipsizdik keńesiniń kún tártibine mynadaı máseleler shyǵaryldy: – Qazaqstan Respýblıkasy ulttyq qaýipsizdiginiń 2012-2016 jyldarǵa arnalǵan strategııasynyń iske asyrylý qorytyndylary, Strategııada belgilengen aldaǵy kezeńge arnalǵan negizgi qadamdardyń tanystyrylymy; – áskerı-tehnıkalyq saıasattyń birqatar aspektisi; – «EKSPO-2017» halyqaralyq kórmesine daıyndyq jáne ony ótkizý kezinde qoǵamdyq qaýipsizdikti qamtamasyz etý sharalary. Elbasy quzyretti memlekettik organdardyń kúsh-jigeri arqasynda ótken kezeńde Qazaqstanda syrtqy qaýipsizdik pen ishki saıası turaqtylyq qamtamasyz etilgenin atap ótti. – Álemdik ekonomıkadaǵy daǵdarys jaǵdaıyna, otandyq ekonomıkanyń qıynshylyqtaryna qaramastan makroekonomıkalyq kórsetkishterdi tıimdi deńgeıde ustap tura aldyq. Ishki, óńirlik jáne jahandyq úderisterge qatysty júrgizilgen taldaý aldaǵy kezeńdegi elimizdiń ulttyq qaýipsizdigine tónýi yqtımal syn-qaterler men qaýipterdi anyqtaýǵa múmkindik berdi. Qazir elimizde Qazaqstan halqyna joldaýda kórsetilgen maqsattar men mindetter, usynylǵan saıası jáne konstıtýsııalyq reformalar talqylanýda. Jalpy, olardyń deni respýblıka turǵyndarynyń qoldaýyna ıe bolyp otyr, – dedi Memleket basshysy. Sondaı-aq, Qazaqstan Prezıdenti qazirgi kezde qaýiptiligi ózekti bolyp otyrǵan ekstremıstik jáne terrorıstik áreketterge qarsy turý eń áýelgi mindet bolyp tabylatynyn aıtty. – Jańa strategııada atalǵan qyzmet baǵyttarynyń árqaısysy boıynsha tıisti qurylymdardyń áreket etý sharalary qarastyrylǵan, – dep túıindedi Nursultan Nazarbaev. Budan bólek, Memleket basshysy memlekettik organdarǵa basqa da salalar men baǵyttarǵa qatysty ulttyq qaýipsizdikti qamtamasyz etý jóninde birqatar mindet qoıdy.