Chempıondar lıgasy. «Manchester Sıtı» óz alańynda «Monakony» jeńdi (vıdeo)

Chempıondar lıgasynyń 1/8 fınalynda «Manchester Sıtı» óz alańynda «Monako» klýbyn qabyldap, 5:3 esebimen jeńdi. Jankúıerler naǵyz tartysty básekeniń kýási boldy. Matchtaǵy alǵashqy gol 26-mınýtta soǵyldy. Leroı Saneniń sol qaptaldan bergen pasyn  Rahım Sterlıng múdirmesten golǵa aınaldyra bildi. Alaıda, aǵylshyndardyń bul qýanyshy uzaqqa sozyla qoımady. Araǵa bes mınýt salyp, oń qaptaldan Fabınıýdiń áýelete kótergen dobyn Radamel Falkao mańdaıymen dál soqqy baǵyttady. Al 40-mınýtta Kılıan Mbappe «Monakony» alǵa shyǵardy. Matchtyń ekinshi taımy da dál osy baǵytta órbidi. 50-mınýtta Radamel Falkao eseptegi basymdyqty arttyratyn múmkindigi bolyp edi. Biraq penaltıdi sátti oryndaı almady. Esesine 58-mınýtta Serhıo Agýero qarsy shabýyl kezinde qaqpany týra kózdep, tarazy basyn teńestirdi. Ońaılyqpen berilmeıtin qonaqtar 61-mınýtta qaıtadan esepte alǵa shyqty. Radamel Falkaonyń qaqpashy boıynan asyra soqqan goly kópshilikti eriksiz tań qaldyrdy. Osydan keıin bar oıynshysymen alǵa umtylǵan alań ıeleri 71-mınýtta esepti 3:3-ke jetkizdi. Buryshtama dobynan kelgen dopqa birinshi bolyp jetken Agýero týra soqqysymen óziniń ekinshi golyn saldy. Dál osyndaı shabýyl 77-mınýtta da boldy. De Brıýıneniń buryshtan kótergen dobyn Djon Stoýnz sátti aıaqtady. Al 88-mınýtta Leroı Sane matchtyń núktesin qoıdy.