Chempıondar lıgasy. «Atletıko» «Baıerden» basym tústi (vıdeo)

Chempıondar lıgasynyń 1/8 fınalynda Leverkýzenniń «Baıeri» óz alańynda Madrıdtiń «Atletıkosyn» qabyldap, 2:4 esebimen ese jiberdi. Matchtaǵy alǵashqy gol 17-mınýtta soǵyldy. Saýl Nıgestiń aınaldyra baǵyttaǵan soqqysy qaqpanyń torynan bir-aq shyqty. Araǵa 8 mınýta salyp madrıdtikter basymdyqty arttyra tústi. Alań ıeleriniń qateligin utymdy paıdalanǵan Antýan Grızmann múmkindigin múlt jibere qoımady. Leverkýzendikterdiń de gol soǵatyn sátteri bolǵan, alaıda alǵashqy taımda tıimdi paıdalana almady. Kezdesýdiń ekinshi bóligi «Baıer» oıynshylary úshin sátti bastaldy. 48-mınýtta Karım Belarabı áriptesi Bendjamın Henrıhsten kelgen dopty qaqpaǵa dál baǵyttaı bildi. Biraq qarqynan taımaǵan Dıego Sımeone shákirtteri shabýylyn údete tústi. 59-mınýtta Kevın Gameıroǵa qarsy oıyn tártibi buzylǵannan keıin tóreshi penaltı belgiledi. Ony fransııalyq oıynshynyń ózi oryndap, komandasynyń úshinshi golyn soqty. Kezdesýdiń 68-mınýtynda esep taǵy da ózgerdi. Sol qaptaldan Iýlıan Brandtyń dobyn Iаn Oblak qaıtaramyn degen oıy júzege aspaı, nátıjesinde Stefan Savıchtiń aıaǵyna tıip, óz qaqpasyna kirip ketti. Degenmen, «Atletıko» da qarap qalmady. Alǵan betterinen taımaı, basymdyqty arttyrý úshin baryn saldy. Nátıjesinde 86-mınýtta Fernando Torres mergendigimen tanylyp, núkteni qoıdy.