Syr óńirinde múmkindigi shekteýli jandar arasynda baıqaý ótti

Qyzylordada «Kedergisiz keleshek» jobasy aıasynda múmkindigi shekteýli jandar arasynda konkýrs ótti, dep habarlady QazAqparat. Sharaǵa «Nur Otan» partııasy Qyzylorda qalalyq fılıaly tóraǵasynyń birinshi orynbasary Sh.Ábdirahmanov, «Ushqyn» qoǵamdyq birlestigi tóraǵasy B.Jumashev jáne múmkindigi shekteýli jandar qatysty. Baıqaý aldynda birlestiktegi múgedek jandardyń qolynan shyqqan buıymdar tanystyryldy. Birlestik tóraǵasy B.Jumashev bul bastamanyń erterekte boı kótergenin, qazirgi tańda birlestik 50 múgedek jannyń tabys tabar orny ekenin jáne qolóner buıymdaryn satylymǵa shyǵarý joly qarastyrylyp jatqandyǵyn aıtyp ótti. Munda sheberler qolónerden bólek plastıkten esik-tereze jasap, aǵashtan túrli jıhazdar daıyndaıdy. Olardyń arasynda tigin sehynda jumys isteıtinder men jarnama agenttigi materıaldaryn ázirleıtinder de bar.  Konkýrs barysynda sheberler ózderin túrli qyrynan, ár salada jasalǵan jumystaryn kórsetti. Partııa tarapynan joǵary baǵalanǵan osy buıymdardyń aldaǵy ýaqytta bazar dúńgirshikteriniń birinen oryn alyp, satylymǵa shyǵýyna kómek beriletini aıtyldy.