Aq tamaqtyń astyndaǵy qara meń

Ánshi Álmyrzanyń osyndaı alasuryp júrgen kezi edi. Súıgenin kórip súısinip, kózden tasa bolsa kúrsingen myń qubylǵan shaǵy bolatyn. Bul ótken ǵasyrdaǵy jetpisinshi jyldyń jaz ortasy. Qyzylorda qalasyna bara qaldy. Arzymas sharýasyn jınaqtap bolysymen osy qaladaǵy naǵashy apasy Kúnimhannyń úıine tústenýge kidirdi. Samaýryn qaınap, dastar­qan jaıylǵansha ermek bolsyn dep shkaf ústindegi albomdy qolyna alǵan-dy. Arasynan gazet qıyndysyn keziktirdi. Iztaı Mámbetovtiń óleńi eken – «Qara meń» dep atalady. Jap-jaqsy óleń, janyna jaǵa ketti. Onsyz da órekpip turǵan júregi dúrsildeı jóneldi. Dereý álgi óleńdi basqa qaǵazǵa kóshirip aldy. Aq tamaqtyń astyndaǵy qara meń, Júregimdi dir etkizdiń qarap eń.., Osydan soń-aq Álmyrzadan maza qashty. Áldeqaıdan bir áýen quıyndaı soǵyp ótip, jym-jylas joǵaldy. Del-sal bolyp bul qalady. О́nerdiń qudireti degen osyndaı túsiniksiz bolar ma?!. Shirkin, Mahabbat! Adamdy meıirimdi de, mereıli eter qasıet! Aqyn da, batyr eter sıqyryn qaıtersiń. Muqaǵalı aıtpaqshy, «Zymııan da osylar, Zııaly da!..». Qyz degeniń de bir pále, jylap turyp kúledi. Kúlip turyp arbaıdy. Júregin án terbep, uzaq «tolǵatqan» án týdy aqyry... «Aq tamaqtyń astyndaǵy qara meń» dep atalady. Án álegimen júrip Álekeń ózin ózi umytqandaı eken, bir jeńildep qaldy. Osy ánin ózi oryndap júrdi. Bir kúni taǵy bir oı tústi. Súıgen qyzy Patmanyń týǵan kúni jaqyndap qaldy. Ol dúkende satýshy bolyp isteıdi. «Týǵan kúnine ne syılasa bolady? Daıyn zatty bergennen ne qadir. Onan da án shyǵarsa qaıtedi?» Ánshi, sazger Álmyrza Noǵaıbaev osy oıǵa bekindi. Patmanyń jaqyn qurbysy bar edi. Esimi-Izimkúl, ekeýi bir klas­ta oqyǵan. Keıde Álmyrza men Patma jastyq jelikpen kelispeı qalsa, ekeýin qaıta jarastyratyn sol qyz. Shyǵar jany bólek demeseń, birin-biri qımas dostar. Sondyqtan da ekeýine eki án arnaý kerek. Kóp uzamaı «Dúkenshi qyz» áni de dúnıege keldi. ...Eńbegi esh ketpedi, kóp uzamaı súıgenine qosyldy. Qyz degenniń – qııamettik joly osylaı alyndy. Álmyrza men Patma bes per­zentti boldy. Aqmaral, Nurlan, Syrlan, Aqmarjan, Ánsaıa! Bári de ómirden óz ornyn tapqan azamattar bolyp jetildi. Aldy nemere súıgizip otyr. – Mahabbatym báseńsigen joq, sál shaý tartqandaı bolsam, «Aq tamaqtyń astyndaǵy qara meń» ánin shyrqap qoıa beremin. Sonda baıaǵy jıyrma besime qaıta oralǵandaı bolamyn, – dep ázildeıdi ánshi aǵamyz. Oınasa da, oıyndaǵysy-aý, jetpiske jýyqtasa da ózi áli kıiktiń ońqaı asyǵyndaı alshy túsýinen tanar emes. Biz munysyna qýandyq. «Ahaý, qara meń! Júregimdi dir etkizdiń qarap eń. О́ziń endi taba qoıshy maǵan em. Aqtamaqtyń astyndaǵy qara meń! Ahaý-ý!». Bul ándi qazir Qyzylordadaǵy fılarmonııanyń «Turan» toby oryndap júr. Úlken sahnalarda tyńdaýshylardyń qulaq quryshyn qandyrar, jastardy eleńdetip, egdelerdi áserlendirgen tamasha ánniń biri. Iá, syrly áýen mahabbat alaý­ymen otaýdy, otandy jylytyp turǵan sekildi. Nurmahan ELTAI Qyzylorda oblysy