Almatynyń «Kók bazarynda» jańa saýda ortalyǵy ashyldy

Almatynyń «Kók bazarynda» jańadan saýda ortalyǵy ashyldy, dep habarlaıdy QazAqparat. Bul saýda ortalyǵy salynǵanǵa deıin jylý berilmegen dúńgirshekterde saýda júrgizilip, eshqandaı jaǵdaı jasalmaǵan bolatyn. 2015 jyly atalǵan orynǵa saýda ortalyǵyn salý týraly sheshim shyǵaryldy. Nysannyń jalpy kólemi  19 myń sharshy metr. «Kók bazardyń» dırektory Erlan Qalıev joba qurylysyn júzege asyrýǵa 2,5 mlrd teńge bólinip, 500 jańa jumys orny ashylǵanyn aıtty. Jańa saýda ornynda 400 kólikke arnalǵan jerasty parkıng te bar. Saýda kesheninde órt qaýipsizdigi, salqyndatý júıesi jasalǵan. «Bizdiń bazardy jańǵyrtýdyń bir kezeńi aıaqtaldy. Jumys ári qaraı jalǵasa beretin bolady. Qazirgi eskı bazar ǵımaratyna kúrdeli jóndeý jumystaryn júrgizýdi josparlap otyrmyz, sonymen qatar, Jibek joly kóshesinen kiretin kireberisterdi jańǵyrtpaqpyz. Barlyǵy aqyryndap júzege asady, ýaqyt mólsherin naqty aıta almaımyn», - dedi E.Qalıev. Jýrnalıster arasynan bazardaǵy baǵa búgingi ashylý saltanatyna oraı, ádeıi tómendetilip otyrǵan bolýy múmkin degen saýal qoıyldy. «Baǵany kórsetý úshin ótirik tómendetip otyrǵanymyz joq. Buryn qandaı baǵa boldy, sol baǵamen qazir de satyp otyrmyz. Munda qymbat emes, eshteńe qymbattaǵan da joq», - dedi bazar basshysy bul suraqqa. Bazarda saýda jasaýshy  Elena Klımova men Svetlana Kozyreva búgin bazardyń ashylýynda kózboıaýshylyqpen jalǵan tómen baǵa qoımaǵanyn aıtty. «Bizdiń taýarlardyń baǵasy ózgergen joq. Sebebi, jańadan ashylǵandyqtan, satyp alýshylar kóp kelip jatqan joq. Saýda ornymyzdyń 1 sharshy metrin 7 myń teńgeden jaldap otyrmyz. Eger kólikti kirgizetin bolsa, burynǵydaı, onda tipti jaqsy bolar edi», - dedi saýdagerler «QazAqparat» tilshisimen bolǵan áńgimede.