Senat ulttyq zańnama arqyly kásipkerlikti damytýǵa daıyn

Senat tóraǵasy bıznestiń ózin-ózi retteýine jaǵdaı jasaý kerektigine nazar aýdardy, dep jazady palata.kz. QR Parlamenti Senatynda «Bıznestiń quqyǵy men zańdy múddesin qorǵaýdy qamtamasyz etý jáne «Atameken» Ulttyq kásipkerler palatasy men memlekettiń osy saladaǵy baılanysy» taqyrybynda tyńdalym ótti. Jıynda QR Parlamenti Senatynyń tóraǵasy Qasym-Jomart Toqaev elimizde bıznes ahýal jaqsarǵanyna, Dooing Bussiness dúnıejúzilik bank júrgizgen reıtıng boıynsha Qazaqstan 190 eldiń ishinde 35 oryndy ıelengenin jetkizip, kásipkerlikti qoldaýda birqatar zańnamalarǵa ózgerister engizilgenin baıandap, «Atameken» Ulttyq kásipkerler palatasy men «Damý» qory bıznesti qoldaýda aıtarlyqtaı úles qosyp otyrǵanyna toqtaldy. «Bizdiń basty maqsatymyz – bıznesti damytý úshin memlekettiń de, kásipkerlerdiń da múddesin baılanystyratyn tıimdi ári qolaıly ortany qalyptastyrý. Iskerlik ahýaldy jaqsartýda jasalyp jatqan istiń jetkiliksiz ekenin kórýge bolady. Sebebi, bizdiń ekonomıkamyzda iri bıznes basymdyq tanytyp otyr. Ekonomıkanyń ártaraptandyrylýy týraly áli de aıta almaımyz. Shaǵyn jáne orta kásipkerliktiń JIО́ úlesi 25%-dan aspaıdy. Al damyǵan elderde bul kórsetkish 50%-dan asady. Qazaqstan bıznesiniń ınnovasııany qoldanýy tómen. 2015 jyldyń qorytyndysy boıynsha JIО́-degi ınnovasııalyq ónim úlesi shamamen 1%. Bul máseleni egjeı-tegjeıli qarap, sebebin anyqtaýymyz kerek», – deıdi Qasym-Jomart Toqaev. Senat tóraǵasy ózin-ózi jumyspen qamtyp otyrǵan azamattarǵa, jeke kásibin ashýǵa nıettengen jandarǵa barynsha qoldaý kórsetip, jastarǵa kásipkerlik negizderin oqytýdy, olardyń jeke bızneste jumys isteýine jaǵdaı jasaý kerektigine basa nazar aýdardy. Sonymen qatar Q.Toqaev sheteldik ınvestorlarǵa, sondaı-aq otandyq kásipkerlerge «bir tereze» qaǵıdasymen qyzmet kórsetý máselesi ózekti, bul baǵytta kemshilikter bar ekenin jetkizdi. Áli de «bir terezeniń» janynan qosymsha «terezeler» ashylyp, mnıstrlikter arasyndaǵy áýre-sarsańnyń sheshilmegenin atap ótti. Qasym-Jomart Toqaev: «Elbasy atap ótkendeı, «Atameken» Ulttyq kásipkerler palatasy elimizde kásipkerlikti qoldaýda paıdaly is atqaryp keledi. Osy parlamenttik tyńdalym Ulttyq kásipkerler palatasynyń bıznes ahýaldy jaqsartýdaǵy qyzmetine demeý bolady dep oılaımyn. Aldaǵy ýaqytta Senat tarapy Qazaqstanda kásipkerlikti sátti damytý úshin zańnamalyq bazany jetildirý jumysyna qatysýǵa daıyn», ­– dep, «Atamekenniń» jumysyna jan-jaqty qoldaý bolatynyn jetkizdi. Senat tóraǵasy, memlekettik baqylaý «anyqtaý men jaza berýden» «aldyn alý men eskertýge» aýystyrylyp, bıznestiń ózin-ózi retteýine jaǵdaı jasaý kerektigine nazar aýdardy. Sondaı-aq QR Úkimetiniń Salyq kodeksin jeńildetip, ony kásipkerler úshin ońtaıly etýge baǵyttalǵan jumysyna qýattap, zańnamalyq turǵyda Senat qoldaý bildiretinin jetkizdi. «Kásipkerligin júrgizip otyrǵan bıznestiń básekege qabiletti bolýyna jan-jaqty kómek kórsetýimiz kerek. Elimizdiń kez kelgen óńirinde jeke kásibin bastaǵysy kelgen azamattar qajetti aqparattardy tolyq ári tegin alýy tıis. Iаǵnı qandaı salada bıznes ashqan qolaıly, qandaı qyzmetter suranysta, qandaı qoldaý sharalary bar ekendigi, bıznesti tez arada qalaı ashý kerektigi jaıynda maǵlumat qoljetimdi bolýy kerek. «Atameken» atalǵan jumysty júrgizýde, qajetti aqparat daıyndalǵan. Endi jergilikti ákimdikter osy baǵytta birlese jumys atqarýy kerek», – dedi Qasym-Jomart Toqaev.