10%-ben ıpoteka beretin baǵdarlama ashyldy

Búgin Ortalyq kommýnıkasııalar qyzmetiniń brıfıngine qatysqan Investısııalar jáne damý mınıstrligi Qurylys jəne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov qazaqstandyqtarǵa arzan ıpoteka berýdiń amalyn aıtty, dep habarlaıdy QazAqparat. «Memleket ıpotekanyń qunyn azaıtý úshin jańadan salynǵan úılerden páter satyp alamyn degen kisilerge  10 paıyzben, al jeke úı salamyn degen azamattarǵa 5 paıyzben ıpoteka beredi. Bul ıpotekalar «Qazaqstan Ipotekalyq kompanııasy» AQ arqyly sýbsıdııalanady», - dedi Marhabat Jaıymbetov. Túsindire ketsek, «Qazaqstan Ipotekalyq kompanııasy» qazir elimizdegi ekinshi deńgeıli banktermen kelissóz júrgizip jatyr. Marhabat Jaıymbetovtiń aıtýynsha, olar (qurylys komıteti men «Qazaqstan ıpotekalyq kompanııasy - agenttik) ekinshi deńgeıli bankterdi 17 paıyzben ıpoteka berýge kóndirip jatyr. Buǵan kelisken bankterdiń bergen 17 paıyzdyq ıpotekasynyń 7 paıyzyn memleket sýbsıdııalaıdy da, azamatqa qalǵan 10 paıyzy qalady. Jeke turǵyn úı salamyn degen azamattarǵa da týra osy mehanızmnen ótý kerek. Jeke úı salamyn degen azamattar úshin budan da az paıyz, ıaǵnı, 5 paıyz kózdelgen. «Osy ıpotekany sýbsıdııalaý úshin 10 mlrd teńge kózdelip otyr. Osyndaı sýbsıdııalaýdyń arqasynda 600 myń sharshy metr turǵyn úı salý josparlanyp otyr», - dedi Jaıymbetov. Bul jeńildikke Turǵyn úı qurylys jınaq bankiniń salymshylary ǵana ıe bola alady.