Qytaı telearnasy Dımash týraly derekti fılm túsirip jatyr

Ánshiniń PR-dırektory ári dosy Alpamys Sharımovtyń aıtýynsha, Dımash Qudaıbergen men Hunan TV arnasynyń túsirilim toby Astanaǵa Qazaqstan týraly, oryndaýshynyń týǵan jeri jaıly sıýjet túsirip jatyr, – dep habarlaıdy Tengrinews.kz tilshisi. Sıýjet qytaılyq telearnada kórsetiledi. Bul rolıkte ánshi óz elin tanystyrady. Al ánshiniń anasy Svetlana Aıtbaeva “Moı GOROD” portalyna bergen suhbatynda Dımash Qudaıbergen men túsirilim tobynyń kelýi jaıly tolyǵyraq aıtyp berdi. “Osy bir-eki kúnniń ishinde qytaılyq jýrnalıster bizdiń otbasymyz jaıly, Dımash oqyǵan mektep pen mýzykalyq kolledjde túsirip úlgerýi kerek. Balamyz taekvandomen aınalysqan sport mektebinde de túsirilim jumystary ótedi”, – dedi Aıtbaeva. Osydan keıin, anasynyń aıtýynsha, qytaılyq jýrnalıster Dımashty at ústinde túsirý úshin ıppodromǵa barady, sebebi qytaılyq jankúıerler ánshige “Qazaqtyń qanaty” degen at beripti. Al osyǵan deıin ánshiniń PR-dırektory ánshiniń Astanaǵa ushyp kelgenin habarlaǵan edi. “Bitpegen sharýalardy áýede bitirýge týra keledi. Bir-eki kúnge Otanǵa kelip jatyrmyz. Eshqandaı BAQ-pen kezdesý, arnaıy fan kezdesýler múmkin emes. Bári jospar boıynsha! Túsirilim! Túsinistikpen qaraǵandaryńyzǵa raxmet!!! Men Astanadamyn!!!”, – dep jazǵan edi Sharımov Instagram jelisindegi paraqshasynda.