Aq Azıada aıaqtaldy

Keshe Japonııanyń Sapporo qalasynda VIII qysqy Azııa oıyndary saltanatty túrde jabyldy. Bir apta boıy alaqandaı araldy dúbirge bólegen Aq Azıada dodasynda 32 eldiń atynan kelgen atletter sporttyń 11 túri boıynsha 64 medal jıyntyǵyn sarapqa saldy. Qazaqstan quramasy Sary qurlyq sportshylarynyń bul saıysynda jaman óner kórsetken joq. Ras, úzdik úshtiktiń ishine kire almadyq. Bir jaǵynan munyń da keshirimmen qararlyqtaı ózindik sebepteri boldy. Máselen, Sapporodaǵy bul saıys Almaty qalasynda ótken XXVIII Dú­nıejúzilik qysqy Ýnıversıadadan soń ile bastaldy da, bizdiń myqty degen sport­­shymyzdyń kóbi Aq Azıada aldynda ty­nyǵyp úlgermedi. Onyń ústine, el qu­ra­masyndaǵy kóshbasshy sanalatyn bir­qa­tar sportshymyz dál osy ýaqyt ara­­lyǵynda ótip jatqan álem chempıonat­ta­ry men Álem kýbogy syndarynda óner kórsetti... Aq Azıadanyń jetinshi kúni frıstaıl sheberi Iýlııa Galysheva qosarlanǵan mogýl boıynsha saıystyń altyn júldesin jeńip aldy. Irikteý synynda Iýlııa japonnyń eki birdeı sportshysy – Hınako Tomıtakı jáne Kısara Sımıoshıdi artqa qaldyrdy. Al altyn medal úshin bolǵan aıqasta Galysheva Kúnshyǵys eliniń taǵy bir ókili Arısý Mýratýdan myqty ekenin dáleldedi. Qola júlde japon qyzy Mıkı Itoǵa buıyrdy. Al budan bir kún buryn bıatlonnan ótken aralas estafeta synynda (2h6 +2+7,5) óner kórsetken eki birdeı qurama komandamyz el qorjynyna altyn jáne kúmis medal salǵan bolatyn. Quramynda Azıadanyń birneshe dúrkin chempıony Galına Vıshnevskaıa, Darıa Ýsanova, Maksım Braýn jáne Iаn Savıskıı syndy sańlaqtar bar birinshi qurama úzdik shyǵyp chempıon atansa, Alına Raıkova, Anna Kıstanova, Vasılıı Podkorytov jáne Anton Pantov sııaqty sheberlerden quralǵan ekinshi komandamyz kúmis júldege qol jetkizdi. Al bul synda japondyq komandaǵa buıyrǵany qola júlde boldy. Jalpy, bul Azıada synyn G.Vısh­nev­­skaıanyń benefısi dese de bolady. Jarystyń sońǵy kúni bıatlonshy qyzymyz 12,5 shaqyrymdyq mass-start básekesinde 39 mınýt 26,6 se­kýn­d kórsetkishpen taǵy da qar­sy­las­ta­ryn qapy qaldyrdy. So­nymen, G.Vısh­nevskaıa munyń aldynda sprınt, qý­da­laý jarysy jáne aralas estafeta synyn­da alǵan úsh altyn júldesiniń sanyn tórtke jetkizdi! Al budan buryn erler arasyndaǵy 15 shaqyrymdyq mass-start synynda Iаn Savıskıı nysanaǵa úsh márte tıgize almaǵanyna qaramastan, qashyqtyqty 44 mı­nýt 12,2 sekýnd kórsetkishpen júgirip ótip, altynnan alqa taqqan bolatyn. Aq Azıadanyń sońǵy kúninde shaıbaly hokkeı dodasynda altyn júlde ıegeri anyqtaldy. Fınaldyq jekpe-jekte Japonııa hokkeıshilerimen kúsh synasqan Qazaqstan quramasy 7:0 esebimen iri je­­ńis­ke jetip, Azııa oıyndarynyń chem­­pıony atandy. Bizdiń qurama sa­py­nan Iаroslav Evdokımov (1-shi jáne 30-mınýttar), Ilıa Kovzalov (3-shi jáne 59-shy), Kırıll Savıskıı (5-shi), Nıkıta Mı­haılıs (13-shi) jáne Konstantın Sa­venkov (36-shy) syndy hokkeıshiler mer­gen­dikterimen kózge tústi. Al hokkeıshi qyzdar arasyndaǵy úshin­shi oryn úshin bolǵan básekede Qazaqstan quramasy Taıland komandasyn 8:0 esebimen oısyrata jeńip, qola júl­dege ıe boldy. Sonymen, sport tarıhynyń qoı­na­ý­y­­na ketken bul Aq Azıada synynda Qazaqstan qurama komandasy barlyǵy 32 me­dal (9 altyn, 11 kúmis jáne 12 qo­la) alyp, jal­py­komandalyq esep boıyn­sha Ja­ponııa (74 me­dal – 27, 21, 26), Oń­tús­tik Koreıa (50 – 16, 18, 16) jáne Qytaı (35 – 12, 14, 9) elderinen keıin tórtinshi orynǵa taban tiredi. Qaırat ÁBILDINOV, «Egemen Qazaqstan»