Qurylys kompanııalary ákimdikti sotqa bermekshi

Qaraǵandy oblysynda qurylys kompanııalarynyń basshylary Buqar jyraý aýdanynyń "Qurylys bólimi" MM-ge qarsy ujymdyq talap-aryz daıyndap jatyr. 2015 jyly osy aýdandaǵy sý alyp ketý oqıǵasynan keıin qurylys kompanııalary tasqynnan zardap shekken úılerdi súrip tastap, onyń ornyna jańa úıler salǵan. Osy shyǵyndy jergilikti bılik tóleýi kerek bolǵanymen, ákimdik tek jartysyn ǵana, onyń ózin keshiktirip bergen. Sheneýnikter sol kezde qurylys kompanııalarynyń óz qarjysyn jumsaýyna kóndirgen. Al kelisimshart túzip, aqshany qaıtaryp alý úshin respýblıkalyq bıýdjetten osy maqsatta qarjy qarastyrylýyn kútý kerektigin alǵa tartqan. Buny qazir ákimdik aýyl halqynyń úı máselesin dereý sheshý úshin istegenin aıtady. "Ákimdik smetaǵa saı sharshy metrine 150 myń teńgeden tóleýge ýáde etti. Biraq biz 90 myń teńgeden ǵana aldyq", - deıdi Qaraǵandy oblysy qurylys kompanııalar qaýymdastyǵynyń dırektory Naılıa Kaırbekova. Qurylys kompanııasy jetekshisi Aleksandr Muqanovtyń aıtýynsha, kompanııalardyń jalpy shyǵyny 15-40 mln teńge aralyǵynda. Esterińizge sala keteıik, Qaraǵandy oblysyndaǵy sý tasqynynan keıin 35 eldi mekendegi 1700 úı zardap shekken edi.