Quralbek Ordabaev: Borodıýk ulttyq quramany jattyqtyrady dep oılamaımyn

Qazaq fýtbolynyń ardageri, dańqty qaqpashy, «Qaırattyń» burynǵy oıynshysy Quralbek Ordabaev Qazaqstan ulttyq quramasyna Aleksandr Borodıýktiń bas bapker bolatyndyǵy jaıly óz oıyn bildirdi. Bul týraly vesti.kz habarlady. «Borodıýk mundaı jaýapty qyzmetke taǵaıyndalady dep oılamaımyn. Ol bizde jumys istep ketti. «Qaıratqa» jetekshilik etti. Berilgen mindetti jóndi atqara almaı, óz erkimen ketti. Onyń bastaýymen komanda jańa maýsymǵa daıyn emes edi. Nátıjesinde, maýsym basynda-aq birneshe ret jeńildi. Osyǵan baılanysty basshylarymyz ony ulttyq quramaǵa shaqyrady dep oılamaımyn», – dedi Quralbek Ordabaev. «Qazirgi ýaqytta bapker aýystyrýdyń esh qısyny kelmeıtin sııaqty. Bıyl negizgi qurama alty resmı kezdesý ótkizedi. Sonyń qorytyndysy boıynsha sheshim shyǵarýǵa bolady. Meniń oıymsha, Talǵat Baısýfınov durys jolda keledi ári álem chempıonatynyń irikteý kezeńderin aıaqtaýǵa múmkindik berý qajet», – dedi dańqty qaqpashy. Aıta keteıik, «Sport-Ekspress» basylymy aldaǵy aıda Aleksandr Borodıýk jańa qyzmetine kirisetinin habarlaǵan.