Dımash Qudaıbergenge arnaıy stıpendııa taǵaıyndaldy

Memleket basshysy Nursultan Nazarbaev ánshi Dımash Qudaıbergenge arnaıy stıpendııa taǵaıyndady. Bul týraly búgin Mádenıet jáne sport  mınıstri Arystanbek Muhamedıuly Qazaq Ulttyq óner ýnıversıtetinde Dımashpen birge ótken kezdesý kezinde aıtty. «Búgin Ulttyq ýnıversıtette erekshe kún. Bárimiz birge Dımashty óner ordasynda qarsy alyp otyrmyz. Bul elimizge úlken maqtanysh. Dımash jastaıynan ózin ónerge arnap, Aqtóbedegi óner ýchılıshesinde, endi Astanadaǵy О́ner akademııasynda dáris alyp júr», - dedi mınıstr. Sonymen qatar ol jas darynnyń ata-anasyna, Dımashtyń ustazdaryna alǵysyn aıtty. «Dımash aıaq astynan tanymal bolǵan joq, burynnan konkýrstarǵa qatysyp keledi. Dımashtyń burynnan beri halyqaralyq baıqaýlarǵa, memlekettiń úlken konsertterine qatysyp júrgenin jaqsy bilesizder. Jaqynda ǵana Elbasy óziniń arnaıy stıpendııasymen Dımashty basqa da óner adamdarymen birge qurmettedi. Bizdiń Elbasymyzdyń Dımashqa degen qamqorlyǵyn osydan bilýge bolady», - dedi mınıstr.