Iýlııa Chernoborodova: Sháripovany jeńý úshin barymdy salamyn

Reseılik boksshy Iýlııa Chernoborodova allfight.ru basylymyna bergen suhbatynda aldaǵy qarsylasy qazaqstandyq Fırýza Sháripova jaıly oı bólisti. Qos boksshy 23 aqpan kúni «Boks akademııasynda» kózqarastar dýelin ótkizgen. «Fırýza óte sabyrly qyz. Teris minezin baıqap úlgermedim. Tez til tabysyp ketkendi jaqsy kóredi eken. Ekeýimiz azdap áńgimelesip te úlgerdik. Buǵan deıingi jekpe-jekteriniń bárin kórdim. Birinshi bolyp shabýylǵa shyǵyp, qarsylastaryn qysymǵa alǵandy unatady. Mine, osyny negizge ala otyryp, aıla-tásilder oılaıtyn bolamyz», – dedi Sháripovanyń qarsylasy. Fırýza sharshy alańda tórtinshi kezdesýin ótkizbek bolyp otyr, al reseılik bylǵary qolǵap sheberi kásipqoı rıngke alǵash ret shyqpaq. «Árıne, maǵan qaraǵanda tájirıbesi kóbirek, ári biraz ýaqyttan beri «Boks akademııasynda» daıyndalyp júr. Biraq osaldyq tanytpaı, oǵan laıyqty qarsylas bolýǵa daıynmyn. Fırýzanyń boıyndaǵy erik-jiger mende de bar. Oǵan eshqandaı múmkindik bermeýge tyrysamyn. Jeńiske jetý úshin barymdy salamyn», – dedi Iýlııa Chernoborodova. Aıta keteıik, qos boksshynyń arasyndaǵy kezdesý 4 naýryzda Balashıha qalasynda ótedi.