Qarjymyzdy Beıbitshilik qoryna aýdarǵanbyz

«Taraz» trıosy qazaq dalasyna ǵana emes, alys-jaqyn shet elderge de tanymal óner ujymy. О́tken ǵasyrdyń 70-80-jyldarynan bastap qazaq dalasyn ánge bólep, áıgili Kenen aqynnyń kórkem ánderin qazaq keńistigine qaıta nasıhattaǵan da osy trıo bolatyn. Búgingi tańda «Taraz» trıosy sahnadan kóp kórinbeıdi degen sóz de halyq arasynda aıtylyp qalady. Osy maqsatta «Taraz» trıosynyń ánshisi, Qazaqstannyń eńbek sińirgen qaıratkeri Asylhan Shúńirekovpen habarlasyp, suhbattasqan edik. – Biz Jambyl oblysynyń sheńberinde ótkizilip jatqan eshqandaı is-sharadan qalyp jatqan joqpyz, – dedi biz­ben áńgimesinde Asyl­han Shú­ńirekov. – Al endi Alma­­ty, Astana sııaqty iri qa­la­larǵa baryp, jekelegen konsertimizdi berip jatpa­ǵanymyz shyndyq. «Taraz» trıosynyń tarıhy tereńde. Biraq biz telearnalardan az kórinemiz. Odan keıin qazirgi shoý-bıznes te basqa arnaǵa burylyp ketti. Top-top bolyp, sol shoýdyń tóńireginde ǵana júrgen ártister bar. Bizden góri solar kóbirek kórinedi. Osydan biraz ýaqyt bu­ryn «Keshki kezdesý» baǵ­dar­lamasyna túsip keldik. Ol jerde trıonyń tarıhy men taǵdyry týraly aıtyldy. Halyq ártisi Altynbek Qorazbaev, Qazaqstannyń eńbek sińirgen qaıratkeri Muhtar Rahmanqulov, odan keıin búginde Jambyl aýdany, Jambyl aýylynda fermer bolyp isteıtin Al­tynbek Bekmuratov trıo tóńi­reginde ádemi áń­gime ór­bitip, tarıhyna toqtal­ǵan bolatyn. Keıin­nen «Qazaq­stan» ulttyq arna­synyń shaqyrtýymen «Da­ra jol» baǵdarlamasyna qatystyq. Jyldar ótken saıyn «Ta­raz» trıosynyń quramy da ózgerdi. Búginde Talas aýdany ákimdigi mádenıet jáne tilderdi damytý bóliminiń basshysy bolyp júrgen Pernebek Ospanov, fermer Altynbek Bekmuratov, Berik Qalıev degen de azamattar trıo quramynda óner kórsetken. Al men aýyl­ǵa, Berik áskerge ketken ýa­qyttarda trıo tarap ketpes úshin, Dúısenbek, Esen­bek, Sátjan degen azamattar bizdiń ornymyzǵa óner kórsetip júrdi. – Eń alǵash Meırambek Bespaevtyń talantyn tanyp, sahnaǵa alyp shyq­qan siz ekensiz. 1987 jyly Meı­ram­bekti Máskeýge de alyp barypsyz. Biraq qazir ol kisini halyq Altynbek Qora­zbaevtyń shákirti re­tin­de tanıdy. Osy jaıynda aıtyp berseńiz... – Meırambektiń Alte­keńniń shákirti ekeni ras. Meırambekti áýeli men kór­dim. Sebebi, biz Meıram­bektiń bala kúninde-aq ákesi Ábiláshimmen dos boldyq. Anasy Jibek te keremet adam. Ol kisilerdiń jasy menen úlken. Biraq áıteýir stýdent kúnimde tanysyp, sodan jaqsy aralasyp ket­tik. Ol kisiler jer úıde, biz jataqhanada turamyz. Sen­bi, jeksenbi saıyn Ábe­­keń­niń úıinde bolyp, án aıtamyz. Áńgime-dúken qura­myz. Meırambek ol kezde kishkentaı bala. Men dombyramen án salsam, soǵan qyzyǵady-aý deımin, áıteýir uıyp tyńdap otyrady. Sodan biz de qolyna dombyra berip, án aıtqyzatynbyz. Keıin Jambyl qalasynda úlken deńgeıde aqyndar aıtysy ótti. Sol kezde Meırambek alǵash ret sahnaǵa shyǵyp, elge óner kórsetken bolatyn. Aıaz Betbaevtyń termesin shyrqap, eldi baýraǵan edi. Sodan bala Meırambekti aıtysker aqyn Serik Qalıev sahnadan kóterip alyp ketti. Qaıtadan bala Meırambekten án aıtýyn suradyq. Kishken­taı balanyń dombyramen án aıtqany ol kezde tań­syq bolatyn. Halyqtyń da yqylasy erekshe boldy. Men 1986 jyly otbasy jaǵdaıymen Moıynqum aýdany, Taldyózek aýylyna kóship kettim. Sol aýylda kásipodaq komıtetiniń tóraǵasy bolyp saılandym. Sonda da Ábiláshim Bes­paev­pen dostyǵymyzdy úzgen joqpyz. Keıinnen aýdan­dyq kásipodaq komıteti konsert uıymdastyryp, sonda Meırambekti aldyryp, án sal­dyrdyq. Konsertten tús­ken aqshany Keńes Oda­ǵynyń Beıbitshilik qoryna aýdar­dyq. Ol ýaqytta qaltaǵa aqsha alyp qalý degen bolmaıtyn. Keıin 1987 jyly Más­keýden shaqyrtý keldi. Sodan Qordaı aýdanynan ánshi Qarlyǵash Qojaǵazına, Talas aýdanynan ánshi, marqum Altynbek Orazbekov, men jáne Meırambek tórteýmiz Máskeýge bardyq. Sonda Meı­rambek týraly «Mos­kov­skıe pravda» gazetinde úlken maqala jarııalandy. Ol ýaqytta Altynbek Qorazbaev oblystyq fılarmonııanyń dırektory edi. Keıinnen Altekeń Meırambekti óz qam­­­­qorlyǵyna alyp, ánderin úı­retip, ózine shákirt qyldy. Al­matyǵa alyp ketip, úlken ánshi bolyp qalyptasýyna eńbek sińirdi. Áńgimelesken Hamıt Esaman, «Egemen Qazaqstan» Jambyl oblysy