Boksshy Aıdar Sháribaev Olımpıada chempıonymen jekpe-jek ótkizdi

Bul kúnderi Maıamıde oqý-jattyǵý jıynyn ótkizip jatqan kásipqoı boksshy Aıdar Sháribaev keshe London Olımpıadasynyń chempıony Lıýk Kempbellmen sparrıngtik jekpe-jek ótkizdi, dep habarlaıdy baq.kz. Bes raýndtyq jekpe-jekten keıin eki tarap ta bir-birine alǵys bildirip, qol alysty. Degenmen, aǵylshyn boksshynyń komandasy túsinikti jaǵdaılarǵa baılanysty sparrıngtiń vıdeosyn jarııalamaýdy ótingen. Aıta keteıik, 29 jastaǵy Lıýk Kempbell 2012 jylǵy London Olımpıadasynyń jeńimpazy, 2008 jylǵy Eýropa chempıony jáne 2011 jyly Bakýde ótken álem chempıonatynyń kúmis júldegeri. 2013 jyly kásipqoı boksqa aýysqan. Búginge deıin enshisinde 16 jekpe-jek bar. Sonyń 15-inde jeńiske jetip, 12 qarsylasyn nokaýtpen jeńgen. Kelesi jekpe-jegi 25 aqpanǵa josparlanǵan Kempbell Iorkshırdiń «Aıs Arena» stadıonynda meksıkalyq Haıro Lopespen aıqasyp, WBC silver chempıondyq belbeýine talasady. Al Aıdar Sháribaev sharshy alańda tórt jekpe-jek ótkizip, barlyǵynda jeńiske jetken. Úsh qarsylasyn nokaýtqa túsirgen. Maıamıdegi Moro’s Gym zalynda belgili kýbalyq Osmırı Fernandestiń qaramaǵynda jattyǵyp júrgen jerlesimiz kelesi aıqasyn 17 naýryzda ótkizedi. «Qazir bapkerim Moro fızıkalyq jattyǵýǵa kóp kóńil bólip jatyr. Kelesi jekpe-jegim naýryz aıynyń 17-sine josparlanǵan. Ázirge qarsylasym belgisiz. Munymen promoýterlerim aınalysýda. Osy jaqta áli biraz bolyp, eki jekpe-jek ótkizemin. Elge sodan keıin ǵana oralamyn», – dedi Aıdar.