Megapolıstegi «Mizam»

Almatyda óndirýshiler men tutynýshylardyń arasyn tikeleı jalǵaıtyn saýda ortalyǵy ashyldy. Bul bastamanyń arqasynda baǵany ósiretin eki aradaǵy deldal uǵymy joıylmaq. «Mizam» atalatyn bul ba­zardyń aýmaǵy da atshaptyrym – 2,5 myń sharshy kılometr jáne bul kórsetkish aldaǵy jazda taǵy da óse túspek kórinedi. Deldalsyz saýdanyń arzanǵa túsetini belgili, bul jerdegi baǵa, basshylyqtyń aıtýynsha, saýda úılerin bylaı qoıǵanda, qara bazardaǵy naryqtan da tómen bolmaq. Sondaı-aq, ónimderdiń ekologııalyq taza bolýy da qatań baqylaýǵa alynady. Qala ákiminiń orynbasary Erlan Áýkenovtiń aıtýynsha, jylyna 228 mıllıard teńgege azyq-túlik tutynatyn turǵyny bar megopolıstegi bul joba eki tarap úshin de óte tıimdi. Satyp alýshy men satýshynyń arasynda tyǵyz qarym-qatynas ornasa, taýardyń sapasy jáne artady. Sonymen birge, bul ortalyq búkil qaladaǵy azyq-túlik baǵasynyń tómendeýine áser etedi. «Mizam» JShS kóterme-bólshek saýda ortalyǵynyń basshysy Dosmuhan Kerimbekov «Eýropa men Azııanyń biraz elderin araladyq, jıyrma shaqty bazardy salystyryp kórdik. Jańa, tyń format izdedik», deıdi. Aqyry Fransııanyń «Ranjıs» naryǵynyń tájirıbesine negiz­deýdi jón kóripti. Saýda orta­lyǵynda óz ónimin satqysy keletinder alyp-satar emes, naqty óndirýshi bolýy – basty talap. Bul jiti tekseristen ótip, ýaqtyly qadaǵalanyp turatynyn aıtady bazar basshylyǵy. Ázirge tusaýy jańa ǵana kesilip, esigi endi ashylyp jatqan ortalyqta 300-ge jýyq adam jumys istep jatyr. Al, negizgi jospar boıynsha 2000 adam jumys­pen qamtylmaq. Bul iri saýda ortalyǵy aldaǵy ýaqytta táý­lik boıy qyzmet kórsetýdi jos­­parlap otyr. Almas NÚSIP, «Egemen Qazaqstan» ALMATY