Tom Leffler: Golovkın tek úzdiktermen kúsh synasqysy keledi

K2 Promotions kompanııasynyń dırektory ári qazaqstandyq Gennadıı Golovkınniń promoýteri Tom Leffler meksıkalyq Saýl Alvarespen jekpe-jek uıymdastyrý úshin qolaısyz jaıttardy qabyl alýǵa daıyn ekenin málimdedi. Bul týraly sports.kz habarlady. «Qazir Golovkınniń bar oıy – 18 naýryz kúni ótetin kezdesý jaıly. GGG-ǵa qarsylas tabý qıynǵa soǵyp jatady. Sol úshin bárin aldyn ala josparlaýdy jón kóremin. Máselen, ótken jyldyń qarasha aıynan beri Erık Gomespen judyryqtasý úshin kelissózder júrgizip jatyrmyn. Bul shara bıyl qyrkúıek aıynda ótedi degen úmittemin. Biraq oǵan deıin Gennadıı Djeıkobsty jeńýi qajet», – dedi Tom Leffler. «Golovkın jylyna tórt márte rıngke shyqqysy keledi. Árıne, múmkin bolǵannyń bárin jasaýǵa tyrysyp baǵýdamyz. Eger «Kanelomen» boks keshin uıymdastyra almasaq, ózge qarsylastar izdeýge kóshemiz. Bolashaqty aldyn ala bilý múmkin emes qoı. Máseleniń kóbi Nıý-Iorktegi aıqasqa baılanysty bolmaq. Dennı tez beriletin boksshy emes», – dedi promoýter. «Al Alvarespen boks keshin ótkizý isine keler bolsaq, ekeýiniń salmaq dárejeleri ártúrli bolǵanmen, bul olarǵa kedergi bolmasy anyq. Biraq ótkenge kóz júgirtsek, aıtýly jekpe-jekter uıymdastyrylǵanmen, ótpeı qalǵandary da bolǵan. Eger 18 naýryzdan keıin «Golden boy» kompanııasymen kelissózderdi júrgizý kerek bolsa, qolymnan kelgenniń bárin jasaımyn. Biz buǵan deıin de ózimizge yńǵaıy kelmeıtin tustardy qabyl alǵanbyz. Eger Alvarestiń tarapy uıymdastyrý jumystaryn tolyǵymen óz qolyna alǵysy kelse, buǵan da kelisemiz. Gennadıı sharshy alańda tek úzdiktermen kúsh synasqysy keledi», – dedi Golovkınniń promoýteri.