Aqordada Konstıtýsııalyq reforma boıynsha otyrys bastaldy

Aqordada bılik tarmaqtary arasyndaǵy ókilettikterdi qaıta bólý jónindegi jumys tobynyń qorytyndy otyrysy bastaldy. Ony Qazaqstan Prezıdenti Nursultan Nazarbaev ashty. "Men halyqqa Konstıtýsııa týraly úndeý jarııalaǵannan beri bir aı ýaqyt ótti. Osy aralyqta jumys toby kóp is atqardy. Konstıtýsııaǵa engiziletin jobalardy tyńdaý, talqylaý boldy, kóp usynys engizildi. Osynyń bárin qarap, arasynda jumys tobynyń múshelerimen de kezdesip, kóp máselelerdi kelisip otyrdyq. Kelip túsken usynystar barlyq jerde muqııat qarastyryldy", - dedi Prezıdent. Sonymen qatar Nursultan Nazarbaev óziniń tapsyrmasymen Konstıtýsııaǵa ózgertýler engizý týraly joba búkilhalyqtyq talqylaýǵa salynǵanyn atap ótti. "Men qoǵamdyq pikirdi muqııat baqyladym. Osyǵan baılanysty men halyqtyń basym bóliginiń biz engizgen ózgertýlerdi qoldaǵanyn kórdim. Búgin biz azamattardan kelip túsken usynystardy, olardyń pikirlerin qarastyramyz. Qorytyndy shyǵaryp, ári qaraı qalaı jumys isteıtinimiz týraly sheshim shyǵaramyz", - dedi ol. Osy rette Memleket basshysy buǵan deıin Parlament arqyly Konstıtýsııaǵa ózgerister engizilgendigin de aıtty. «Sebebi bizdiń Konstıtýsııamyzda Konstıtýsııaǵa ózgerister referendým arqyly da, Parlament arqyly da engizýge bolady dep aıtylǵan. Ony Prezıdent sheshedi. Sondyqtan konstıtýsııalyq quqyqty paıdalandym. Negizgi saıası júıege aıtarlyqtaı ózgerister engizeıik dep otyrǵanymyz joq. Istelip jatqan jumystyń barlyǵy elimizge, jurtymyzǵa kerek ekinshi dárejedegi máseleler bolǵannan keıin jurttyń barlyǵyn dabyratpaı Konstıtýsııanyń talaby boıynsha Parlament arqyly ótkizýdi durys dep sanadym», - dedi Nursultan Nazarbaev. Sonymen qatar Prezıdent buǵan deıin Konstıtýsııaǵa engizilgen ózgerister eldiń damýyna aıryqsha áser etkenin aıtty.