Boksshy Bekman Soılybaevtyń qarsylasy aýysty

WBC nusqasy boıynsha Eýrazııa jáne WBA NABA tujyrymynyń chempıony qazaqstandyq boksshy Bekman Soılybaevtyń (9-0, 4 KO) qarsylasy aýysty. Boxrec.com basylymynyń málimeti boıynsha Bekman 10 naýryz kúni meksıkalyq Marıo Antonıo Masıaspen jekpe-jek ótkizýi tıis bolatyn. Endi ol Meksıkanyń taǵy bir tájirıbeli boksshysy German Meraspen kúsh synasady. Segiz raýndtyq kezdesý Tastın qalasynda (AQSh, Kalıfornııa shtaty), ekinshi jartylaı jeńil salmaqta ótedi. "Shynymdy aıtsam, German Meras jaıly eshnárse bilmeımin. Biraq Boxrec saıtyndaǵy statıstıkasy tań qaldyrmaı qoımaǵany anyq. Jasy 30-da eken. Kásipqoı boksta 99 jekpe-jek ótkizip úlgeripti. Men onyń júzinshi qarsylasy bolamyn. Tájirıbesi kóp ekeni aıtpasa da belgili. Ol jaıly málimetter jınap, álsiz jáne myqty tustaryn tolyq zerttep úlgeremiz dep oılaımyn", -  dedi Bekman Soılybaev. Aıta keteıik, qazaqstandyq boksshy sońǵy ret sharshy alańǵa ótken jyly shyqqan. Sodan beri qolynan jaraqat alyp, rıngke shyǵa almaǵan. Qazirgi ýaqytta Bekman Soılybaev Los-Andjeles qalasynda Wild Card West jattyǵý zalynda amerıkalyq bapker Erık Braýnmen birge jattyǵý jasap júr. Otandasymyz kásipqoı boksta 9 kezdesý ótkizip, bárinde jeńiske jetken. Onyń tórteýin nokaýtpen aıaqtaǵan. Aldyn ala málimet boıynsha budan keıingi aıqasy osy jyldyń sáýir aıyna josparlanyp otyr.