Konstıtýsııanyń 26-baby ózgertilmeýi múmkin

Konstıtýsııanyń 26-baby eski redaksııada qalýy múmkin. Bul týraly búgin bılik tarmaqtary arasyndaǵy ókilettikti qaıta bólý jónindegi jumys tobynyń otyrysynan keıin BAQ ókilderine suhbat bergen D.Qonaev atyndaǵy Eýrazııa zań akademııasynyń rektory О́miráli Jalaıyrı málim etti, dep habarlaıdy QazAqparat. «Konstıtýsııanyń 26-babyna engizilýi kózdelgen túzetý shyn máninde qoǵam tarapynan úlken rezonans týdyrdy. Kóptegen azamattar ony jermen baılanystyrdy. Sondyqtan búgingi otyrys barysynda jumys tobynyń músheleri tarapynan bul túzetýdi alyp tastaý týraly usynys jasaldy. Menińshe, Konstıtýsııanyń 26-baby eski redaksııada qalatyn bolady»,- dedi ol. Aıta keteıik, búgingi otyrys barysynda QR Prezıdenti Ákimshiliginiń basshysy, jumys tobynyń jetekshisi Ádilbek Jaqsybekov Konstıtýsııanyń 26-babyna qatysty usynystar mol bolǵanyn atap ótken edi. «Bul máselege qatysty ashyq pikirtalas boldy. Pikirler ártúrli. Azamattardyń bir bóligi bul normany oń baǵalap otyr nemese ózderiniń redaksııalaryn usynady. Degenmen, kópshiligi 26-bapqa ózgertý engizýbeýdi suraýda», - degen edi ol. Al atalǵan jumys tobynyń taǵy bir múshesi, Qazaq gýmanıtarlyq zań ýnıversıteti Azamattyq-quqyqtyq zertteýler ǵylymı-zertteý ınstıtýtynyń dırektory Tólesh Qaýdyrovtyń aıtýynsha, 26-bapqa qatysty Qazaqstan Prezıdenti taıaý kúnderi naqty sheshim qabyldaıtyn bolady. «Bir aıǵa sozylǵan konstıtýsııalyq reformalardy talqylaý prosesi búgin aıaqtaldy. Jobany bastan-aıaq qaıta qarap shyqtyq. Komıssııa músheleri biraýyzdan jobanyń 99 paıyzyn qabyldady dep aıtýǵa bolady. Atyshýly 26-bapqa baılanysty sońǵy sheshim qabyldanǵan joq. Oǵan qatysty Prezıdentimizdiń sheshimi bolady. Osydan keıin qujat Parlamentke engiziledi»,- dedi ol. Onyń atap ótýinshe, el azamattarynan konstıtýsııalyq reformaǵa baılanysty 6 myńnan astam usynys kelip túsken. Olar Konstıtýsııanyń 98 babynyń 63 babyna qatysty boldy. «Usynystar jan-jaqty. Úkimettiń qyzmetinen bastap, quqyq qorǵaý organdarynyń, sottardyń jastaryna qatysty da máselelerge halyq qyzyǵýshylyq tanytqan. El boıynsha ártúrli deńgeıdegi 200-den astam otyrys ótti. Jalpy, 2 myń adam túsindirý jumystaryna atsalysty. Konstıýsııalyq reforma qoǵam tarapynyń zor qyzyǵýshylyq týyndatty dep aıtýǵa bolady», - dedi Qaýdyrov. Sonymen qatar ol BAQ ókilderiniń 26-bapqa qatysty naqty sheshim qashan qabyldanady degen saýalyna da jaýap berdi. «Prezıdent búgin ne erteń 26-bapqa qatysty óz sheshimin shyǵarady. Elbasynyń paıymynsha, birinshi kezekte halyqtyń pikirin, kózqarasyn eskerý qajet. Konstıtýsııa 100 paıyzdyq kelisimniń nátıjesi bolýy tıis. Menińshe, búkil halyqtyń rızashylyǵyn týdyratyn sheshim qabyldanady»,- dedi ınstıtýt dırektory.