Almatymen qaýyshýǵa kele jatqan Parıj

Kópten josparlanǵan Fransııanyń Almatyda ótetin halyqaralyq kúnderi de jaqyndap qaldy. Almatylyqtar juma kúni bastalatyn mádenı kúnderde osynaý eldiń rýhyn sezinip, tarıhymen janasyp, ónerdegi, ómirdegi tabystarymen, aıtýly taýarlarymen de keńirek tanysatyn bolady. Qysqasy, qalalyqtar bul kún­deri «fransýzdarsha ómir súrip», fransýzdardyń turmysy men óneri týraly aqparat alady. Bıylǵy jyldyń baǵdarlamasy boıynsha mádenı oqıǵa aıa­synda 2-shi Halyqaralyq «Regard de France» kórmesi ótpek. Bul kór­mede Qazaqstandaǵy fransýz kom­panııa­larynyń taýarlary, brendteri saltanat qurady. Al demalys, ıaǵnı 4-5 naýryz kúnderi Almatydaǵy The Ritz Carlton qonaqúılerinde mádenı baǵdarlamalar sherýi júredi. Senbi kúni keshkilik «Shymbulaq» bıik taý shańǵysy kýrortynda dástúrli fransýz keshi uıymdastyrylyp, áýesqoılar shańǵymen syrǵanaıdy. Mysaly, Sen-Trope qalasynan kelgen delegasııa quramynda týrıstik bıznes ókilderi, «Byblos» oteliniń ataqty shef-aspazy jáne tanymal mýzykanttar bar. Al «Áıeldi qudaı jaratqan» atty fotokórme ataqty fransýz kınoaktrısasy Brıdjıt Bardoǵa arnalǵan. Áıgili aktrısa Sen-Trope qalasynyń betke ustar maqtanyshy ekeni belgili. Bul kórmeni Esentai Mall saýda ortalyǵynda naýryzdyń 4-30 aralyǵynda qala merııa­sy usynǵaly otyr. Munda Brıdjıt Bardony álem­dik dańqqa bólegen «Áıeldi qudaı jaratqan» kınolentasy kórsetiledi. Fransııanyń ońtústik shahardaǵy kún­deri barynsha aıshyqty ótý úshin Almatydaǵy Fransııanyń Bas kon­sýldyǵy, qaladaǵy Fransııanyń isker seriktes kompanııalarynyń qazaq­standyq qaýymdastyǵy baryn salýda. Aýqymdy sharaǵa uıytqy bolyp otyrǵan elshilik mundaı mádenı baılanystar, túrli kórmeler, iskerlik kezdesýler, qyzyqty tusaýkeserler ekijaqty tatýlyq pen túsinistikti tereńdete túsedi dep biledi. Aınash ESALI, «Egemen Qazaqstan» ALMATY