Astanadaǵy Beıbitshilik jáne kelisim saraıynda Qazaqstan halqy Assambleıasynyń Alǵys aıtý kúnine arnalǵan forýmy ótti. Oǵan Memlekettik hatshy Gúlshara Ábdiqalyqova, QHA Tóraǵasynyń orynbasary – Hatshylyq meńgerýshisi Eraly Toǵjanov, sondaı-aq, memlekettik organdardyń basshylary, QHA músheleri, etnomádenı jáne jastar birlestikteriniń, analar keńesiniń, qoǵamdyq kelisim keńesiniń, ǵylymı-shyǵarmashylyq zııaly qaýymnyń ókilderi, halyqtyń dástúrli qolóner sheberleri, mesenattar, jastar qatysty.
Forýmdy ashqan Memlekettik hatshy: «Birligi jarasyp, yntymaǵy artqan táýelsiz Qazaqstanda Alǵys aıtý kúni el ómirindegi eleýli dataǵa aınaldy», deı kele, atalǵan merekege baılanysty Qazaqstan Prezıdentiniń halyqqa arnaǵan quttyqtaýyn oqyp berdi.
Elbasy óziniń quttyqtaý sózinde: «Alǵys aıtý kúni – bizdiń memlekettik jáne qoǵamdyq kúntizbemizde jaqynda ǵana paıda bolǵan erekshe kún. Alaıda, bul mereke shyn máninde tereń tarıhı irgetasqa negizdelgen. Ol adamnyń boıyndaǵy eń asyl qasıetter – meıirimdilik, raqymdylyq, ózara qoldaý-kómek, ózin ózi qurban etý barynsha kórinis tapqan almaǵaıyp zamandy eske salady. Alǵys aıtý kúnin atap óte otyryp biz, bir jaǵynan, halqymyzdyń rýhanı qaharmandyǵyna qurmet kórsetip, ótkenge kóz júgirtemiz. Al, ekinshi jaǵynan, adamgershiliktiń aınymas negizderi arqyly jol tartylǵan bolashaqqa zor senimmen qaraımyz», – degen.
Sonymen qatar, Memleket basshysynyń quttyqtaýynda: «Men Táýelsiz elimizdi birlesip quryp jatqan Qazaqstan halqyna yntymaǵy men erik-jigeri úshin alǵys aıtamyn. Qaıyrymdylyq pen ózara kómek kórsetý dástúriniń odan ári nyǵaıa túsetinine senimdimin. Alǵys aıtý kúnimen barshańyzdy shyn júrekten quttyqtaımyn! Barshańyzǵa baqyt, otbasylaryńyzǵa ıgilik, dostyq pen ósip-órkendeý tileımin!», – delingen.
Budan keıin Qazaqstan halqy Assambleıasy Tóraǵasynyń orynbasary E.Toǵjanov, «Alef» evreı mádenı-aǵartý qoǵamynyń jetekshisi M.Goldberg, Qazaqstan koreıleri qaýymdastyǵynyń ókili A.Iýgaı ózara túsinistik pen qoldaý elimizdiń rýhanı qaǵıdatyna aınalǵanyn aıtty. Máselen, Eraly Toǵjanov ótken jyly Prezıdenttiń Alǵys aıtý kúnin merekeleý týraly Jarlyqqa qol qoıǵanyna toqtala kele, 1 naýryz – Qazaqstan halqy Assambleıasynyń negizi qalanǵan kún ekenin de atap ótti. «Alǵys aıtý – adamgershiliktiń belgisi. Onyń ózeginde qaıyrymdylyq, meıirimdiliq, ózgege qolushyn sozý, shyn janashyrlyq tanytý sekildi izgi qasıetter jatyr. Demek, osynaý erekshe kúnniń azamattardy biriktirýdegi áleýeti orasan», – dedi QHA Tóraǵasynyń orynbasary – Hatshylyq meńgerýshisi.
Al Qazaqstan koreıleri qaýymdastyǵynyń ókili Aleksandra Iýgaı: «Bıyl koreı ultynyń kıeli qazaq jerine taban tiregenine 80 jyl toldy. Osy jyldar ishinde bizge kórsetken yqylas-nıetterińiz úshin ata-babamyzdyń atynan bas ıe otyryp, Qazaq eli men jerine alǵys aıtamyn. Aǵa býyn ókilderiniń árqaısysynyń júrek túkpirinde: «Qazaq eline myń alǵys!» degen sóz bar dep oılaımyn. Sondyqtan, 1 naýryz – Qazaqstandy mekendegen árbir azamatqa óz Otanyna alǵys bildirýine múmkindik beretin mańyzdy kún. Bul – jylylyq pen meıirimdilik merekesi», – dedi.
Forýmǵa qatysýshylar Qazaqstannyń sándik-qoldanbaly óner sheberleriniń kıizden jasaǵan buıymdary qoıylǵan «Jan jylýy» atty ekspozısııalyq kórmeni tamashalady. Al is-shara sońynda Assambleıanyń jańa múshelerine Qazaqstan halqy Assambleıasy kýálikterin saltanatty jaǵdaıda tabys etý rásimi ótti, sondaı-aq halyqqa jáne el Prezıdentine alǵys bildirgen úndeý qabyldandy.
Láıla EDILQYZY, «Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
