Seksen jyl sarǵaıtqan shyndyq

О́tken jyldan bastap Ishki ister mınıstrliginiń uıytqy bolýymen mvd.gov.kz arnaıy veb-portaly iske qosylǵany belgili. Saıası repressııa qurbandary týraly aqparatty anaǵurlym qoljetimdi etý men olardy este saqtaýda mańyzy zor «Memorıal» servısiniń qazirgi qyzmeti kóptiń kóńilinen shyǵýda. Búginde «Memorıalǵa» zulmatty jyldary qýǵyn-súrginge ushyraǵan 110 myńǵa jýyq janǵa qatysty túrli derekter engizilgen. Son­dyq­tan da, memlekettik qyzmet kórsetý sheń­be­rinde Qazaqstannyń ishki ister organdaryna alys jáne jaqyn shet elderden áleýmettik-qu­qyq­tyq sıpattaǵy sanqıly hattar men rep­res­sııaǵa ushyraǵan týystaryna qatysty má­li­met suratqan saýaldar tolassyz túsip jatady. Máselen, kúni búginge deıingi ýaqytta qýǵyn-súrginge ushyraǵan adamdardyń týystarynan, ǵalym-zertteýshilerden, qoǵamdyq uıymdardan, muraǵattar men memlekettik organdardan 789 ót­inish tirkelgen. Bul qoldanystaǵy zańnamaǵa sáı­kes aqtalǵan azamattar, ne bolmasa olardyń ókilderi qaıtys bolǵan jaǵdaıda olardyń týys­tary qylmystyq isterdiń prosestik emes sıpattaǵy qujattarymen tanysýǵa, sondaı-aq, iste saqtalǵan qoljazbalaryn, fotosýretterin já­ne ózge de jeke qujattaryn nemese olardyń kó­­shirmelerin alýǵa quqyǵy bolýymen tikeleı baı­lanysty. Izgi nıetpen qurylyp, iske kirisken «Me­mo­rıal» derekqorynan qýǵyn-súrginge ushy­raǵan Keńjasar Keńshýaqovtyń urpaǵy Eńlik Naý­ryzbaeva jýyrda ǵana óz atasynyń taǵ­dyr-talaıyna qatysty tyń málimetke qol jetkizdi. Ol saıtqa resmı saýal joldaý arqyly 1937 jyly saıası tutqynǵa alyn­ǵan K.Keńshýaqovtyń isteri Soltústik Qazaqstan oblysy Ishki ister departamentiniń mu­ra­ǵatynda saqtaýly turǵanyn bilgen. Bıyl­ǵy jyldyń 6 aqpanynda IIM Arnaıy mu­ra­ǵa­tynyń qyzmetkerleri E.Naýryzbaevany ata­synyń isimen tanystyryp, onyń atý ja­zasyna kesilgeni jáne múlkiniń tárkileýge alyn­ǵany týraly jazylǵan qujattardy mar­qumnyń nemeresiniń qolyna tabystady. Al óz zamanynyń qýǵyn-súrginine ushyrap, ja­zyq­syz atylǵan Keńjasar Keńshýaqovtan qalǵan jal­ǵyz tuıaq – qyzy Ámınash apa qazir 92 jasqa qa­dam basypty. Keıýana qazirgi tańda Astanada tu­rady eken. Qaperlerińizge sala keteıik, 2014 jyly ishki ister organdary ulttyq qaýipsizdik qyz­me­tinen sot organdary aqtaǵan repressııaǵa ushy­r­aǵan azamattardyń qylmystyq isterine qa­tysty trofeılik materıaldardy qabyldaǵan edi. Olardyń quramynda Uly Otan soǵysy kezinde tutqynǵa túsip, keıinnen Germanııadan eline oralǵan burynǵy KSRO azamattary týraly qujattar da boldy. Erekshe atap óterligi sol, Almaty qalasynyń IID muraǵatyna qýǵyn-súrginge ushyraǵan qazaq ıntellıgensııasynyń qaıratkerleri Ahmet Baıtursynov, Oraz Jandosov, Ilııas Jansúgirov jáne Sáken Seıfýllın syndy ult ardaqtylaryna qatysty bir­qatar muraǵat qujattary da qabyldanǵan. Nurlybek DOSYBAI, «Egemen Qazaqstan»