Qazaqstandyq klýbtar alda keledi

Joǵary hokkeı lıgasyndaǵy pleı-off synynda óner kórsetip júrgen qazaqstandyq qos klýb syrt aıdynda ózderiniń úshinshi kezdesýlerin ótkizdi. Turaqty chempıonattyń je­ńimpazy – О́skemenniń «Torpedo» komandasy Ijevskide «Ijstal» klýbymen kúsh synasyp, 2:3 esebimen utylyp qaldy. Bul oıynda birinshi shaıbany aıdyn ıeleri saldy. Matchtyń 13-mınýtynda Kırıll Knıazevtiń soqqysy dittegen jerine dál tıgen edi. Budan keıin kezdesýdiń 16-shy jáne 25-shi mınýttarynda «Ijstaldiń» shabýylshysy Denıs Polıýdov qatarynan eki gol soǵyp, esepti 3:0-ge jetkizdi. «Torpedonyń» quramynan Konstantın Romanov (39-shi mınýt) pen Aleksandr Shın (41-shi mınýt) esep aıyrmashylyǵyn qysqartqanymen, oıyn 3:2 bolyp aıdyn ıeleriniń paıdasyna sheshildi. Qaraǵandynyń «Saryarqasy» Chehov qalasynda jergilikti «Zvez­damen» oınap, 1:0 esebimen jeńiske jetti. Mıhaıl Anısınniń kezdesýdiń 21-mınýtynda soqqan jalǵyz shaıbasy Arqa hokkeıshilerine jeńis syılady. Ázirge «Torpedo» men «Sary­arqa» oıyndar serııasy boıynsha 2:1 esebimen alda keledi. Eske salar bolsaq, pleı-off erejesi boıynsha, tórt ret jeńiske jetken komanda jarystyń kelesi kezeńine shyǵady. Qaırat ÁBILDINOV, «Egemen Qazaqstan»