"Atameken" OQO-daǵy kəsipkerlikti damytýǵa barynsha qoldaý kórsetedi

Ońtústik Qazaqstan oblysynyń ákimi Janseıit Túımebaev «Atameken»  Ulttyq kásipkerler palatasynyń Basqarma tóraǵasy Abylaı Myrzahmetovpen kezdesti. Júzdesý barysynda kásipkerlikti damytý baǵdarlamasy talqylanyp, ákimshilik kedergilerdi azaıtý, óńirde bıznes júrgizýge qolaıly jaǵdaı jasaý  jaıy sóz boldy, dep habarlady OQO ákiminiń baspasóz qyzmeti. Abylaı Isabekuly óz kezeginde  kásipkerlerdiń jumysyn ońtaılandyrý jáne tıimdiligin arttyrý maqsatynda  oblys ákimdigimen birlese jumys isteýge nıetti ekendigin jetkizdi. «Elbasy Joldaýynda aıtylǵan negizgi basymdyqtardyń biri – jumyspen qamtý jáne kásipkerlikti damytý. Joldaý aıasynda  Ulttyq palatanyń jumys jospary bekitildi.  Bizdiń basty maqsatymyz – halyqtyń kásipkerlikke degen yntasyn oıatyp, óz qabiletin ashýǵa járdemdesý. Osy maqsatta Ońtústik  Qazaqstan oblysy ákimdigimen birlese jumys atqarýǵa daıynbyz» ,- dedi Abylaı Myrzahmetov. Aıta keteıik, Ulttyq palata basshylyǵy bıyl 11 myń sanıtarlyq-epıdemıologııalyq talaptardy 3 myńǵa qysqartqaly otyr. Bul aýqymdy jumys 2018 jyldyń 1 qańtaryna deıin jalǵasatyn bolady. «Elbasy qabyldaýynda bolǵanymda óńirdegi kásipkerlikti damytý jóninde tapsyrma júkteldi.   Soǵan sáıkes  óńirimizde kásipti damytý baǵytynda túrli memlekettik baǵdarlamalardyń júzege asyrylýyn,  qarjy-nesıelik qoldaý saıasatyn jetildirý isi qolǵa alynyp otyr. Bul rette biz óńirlik baǵdarlamalar kestesin túzip, júıeli jumysty bastap jiberdik. Aldaǵy ýaqytta ońtústikte kəsipkerlikti qoldaýdyń barlyq tetigi iske qosylady» , - dedi oblys ákimi Janseıit Qanseıituly. Aıta keteıik, Ońtústik Qazaqstan oblysynda 2016 jyldyń qorytyndysymen jumys istep turǵan shaǵyn jáne orta kásipkerlik sýbektileriniń sany 173 myń 770-ke jetip otyr.  Bul respýblıka boıynsha úlesiniń  14,6 paıyzyna jetip, oblystar arasynda birinshi oryndy ıelendi. Oblystaǵy shaǵyn jáne orta bıznestiń damýyna úlesin qosyp keletin Kásipkerlerge qyzmet kórsetý ortalyǵy  bir jyl ishinde  37 232 kásip ıesine nesıelik qoldaý kórsetken. Sonymen qatar, «Jumyspen qamtý 2020» baǵdarlamasy aıasynda    óz isin bastaımyn degen  2 339 azamatqa  6,6 mlrd.teńge  kóleminde  nesıe berilgen.