"Astana Arlandaryna" jańa dırektor taǵaıyndaldy

Búkilálemdik boks serııasyna qatysatyn "Astana arlandary" klýbynyń atqarýshy dırektory bolyp Saıat Ábildın taǵaıyndaldy. Bul týraly vesti.kz habarlaıdy. Buǵan deıin ol bas menedjerdiń orynbasary qyzmetin atqarǵan. "Maýsymnyń naǵyz qyzǵan shaǵynda qyzmetimnen ketýge týra kelip tur. Qazirgi sátte ujym 4 naýryz kúni Atyraýda "Qytaı aıdaharlaryna" jáne 18 naýryz kúni Tarazda "Reseı patrıottaryna" qarsy jekpe-jekterge daıyndalyp jatyr. Klýb ishindegi bilikti mamandy qoıǵanyna qýanyshtymyn. Saıatty burynnan bilemin. Aldaǵy ýaqytta bastaǵan árbir isine tek tabys tileımin", - dedi klýbtyń burynǵy dırektory Serik Sápıev. Aıta keteıik, 28 aqpanda ortalyq saılaý komıssııasynda ótken jıynda "Nur Otan" partııasynyń múshesi Sápıev Serik Jumanǵalıulyn Qazaqstan Respýblıkasy Parlament Májilisiniń depýtaty retinde tirkeý sheshimi qabyldanǵan bolatyn.