Fırýza Sháripova jaraqatpen sharshy alańǵa shyqty – menedjeri

Qazaqstandyq kásipqoı boksshy qyz Fırýza Sháripovanyń reseılik Iýlııa Chernoborodovaǵa qarsy aıqasy jaıly menedjeri Sergeı Zavıleıskıı pikir bildirdi. Bul týraly sports.kz habarlady. «Jekpe-jek Fırýza úshin ońaı ótken joq. Iýlııa kásipqoı rıngke alǵash ret shyǵyp tursa da, ońaı qarsylas emestigin taǵy bir márte dáleldeı tústi. Aldaǵy ýaqytta bári júıeli túrde júzege assa, bolashaǵynan úlken úmit kútýge bolady. Promoýteri Elena Markova óz isiniń sheberi. Iýlııa úshin qajetti jaǵdaıdyń bárin jasaıdy dep oılaımyn», – dedi Zavıleıskıı. «Fırýza kúmánsiz jeńiske jetti. Tek alǵashqy raýnd qana teń dárejede aıaqtaldy dep aıta alamyn. Sebebi, jattyqtyrýshy Sergeı Kýıbyshev qarsylasynyń yńǵaıyn bilip almaq úshin arttyq qımyldamaý jóninde tapsyrma bergen. Onyń ústine Sháripova sońǵy sparrıng kezdesýinde qarsylastarynyń birimen soqtyǵysyp qalyp, murnyn jaraqattap alǵan. Osydan keıin jekpe-jekti keıinge qaldyrmaq bolǵanbyz. Dárigerler judyryqtasa alatynyn, biraq soqqy jiberip alsa, qatty aýyrsynatynyn aıtqan. Fırýza alǵan betinen qaıtpaı, sharshy alańǵa shyqty», – dedi menedjeri. «Sháripova úshin bul úlken tájirıbe boldy. Kezekti ret óziniń myqtylyǵyn dáleldeı tústi. Bastysy, bir orynda turyp qalmaı, kún sanap deńgeıi artyp keledi. Endigi maqsat – tıtýldy aıqas ótkizý. Shamamen kelesi aıǵa josparlap otyrmyz. Biraq taǵy bir aıta keterim, qarjy jaǵynan azdap qınalyp otyrmyz. Al fızıkalyq jáne moraldyq turǵydan ol bárine daıyn. Murnyn emdegennen keıin jattyǵýlaryna qaıta kirisedi», – dedi Sergeı Zavıleıskıı. Aıta keteıik, 4 naýryz kúni Fırýza reseılik qarsylasyn alty raýndtyń qorytyndysy boıynsha tóreshilerdiń biraýyz sheshimimen jeńgen bolatyn.