«Egemenniń» asa baı fotomuraǵatynda saqtalǵan, Qazaqstannyń keńes dáýirindegi tarıhyn, táýelsizdiktiń mańyzdy sátteri men jarqyn jetistikterin, qarapaıym adamdar turmysyn beıneleıtin sýretter, sondaı-aq Elbasynyń, ózge de memleket, qoǵam jáne mádenıet qaıratkerleri men ataqty sportshylardyń, Qazaqstan qalalary men kórikti jerleriniń sırek fotosýretteri Ýıkıpedııa onlaın-ensıklopedııasy arqyly ǵalamtor paıdalanýshylaryna usynyla bastady.
«Álemniń kez kelgen túkpirinen ınternet arqyly Qazaqstandy izdegen adam osy sýretterdi kóre alady. Sýretterdiń aǵylshyn, orys, qazaq tilindegi túsindirmeleri bolady. Birinshiden, bul joba arqyly asa qundy fotomaterıaldardy joǵalýdan saqtaımyz. Ekinshiden, olardy kópshilik nazaryna usynamyz», dedi «Egemen Qazaqstannyń» arnaıy jobalaryn tanystyrý kezinde sóılegen basylym jetekshisi Darhan Qydyráli.
Wikibilim qorynyń basshysy Raýan Kenjehan avtorlyq quqyq máselesi qazirgi kezde ózekti ekenin, al atalǵan jobada "Egemen Qazaqstannyń" avtorlyq quqyǵy tolyǵymen saqtalatynyn aıtty. "Búkil dúnıejúzindegi kontenttiń, mátinderdiń, foto, vıdeomaterıaldardyń erkin aınalymyn qamtamasyz etetin eń úlken repozıtarıı Wikimedia Commons dep atalady. Iаǵnı, álemniń kez kelgen jerinde Qazaqstanǵa qatysty aqparat, fotomaterıal izdegen adamdar eń birinshi kiretin jeri osy. Bul júıe zańdy túrde kez kelgen materıaldy taýyp alyp, avtorlyq quqyqty saqtaı otyryp, zańdy túrde qoldanýǵa múmkindik beredi. Sondyqtan, osy usynysty qoldap, "Egemen Qazaqstandy" jańartý baǵdarlamasynyń bir bóligi retinde qolǵa alǵan gazet basshysyna kóp rahmet aıtamyz", dedi Raýan Kenjehanuly.
