1997 jyly atyraýlyq kúı qaǵany Rysbaı Ǵabdıevtiń shaqyrýymen Dına Núrpeıisova atyndaǵy akademııalyq qazaq halyq ult aspaptar orkestrine ánshi bolyp keldi. Sodan beri Jaıyqtyń o jaǵy men bu jaǵynan ǵana áýelep án ozdyrmaı, shet el sahnalarynda da tyńdarmandaryn tań qaldyryp júr. Qazir onyń repertýarynda batys óńirdegi barlyq ánshilik mekteptiń 250-den astam áni bar. Odan bólek, dástúrli ónermen bolashaqtaryn baılanystyrǵan jastardyń tálimgeri, ustazy.
Mine, osyndaı daraboz darynnyń ónerin baǵalap, nasıhattaý maqsatynda Atyraý oblysy ákimdiginiń qoldaýymen shyǵarmashylyq kesh ótti. Oǵan Qaırat Kákimovtiń ónerdegi syılas dos-joldastary elimizdiń túkpir-túkpirinen kelip, Jaıyq jaǵasyn jaýhar jyrǵa bóledi. Kezinde memleket jáne qoǵam qaıratkeri, halyq jazýshysy Ábish Kekilbaev Qaıratqa «Halyq aýzynda saqtalǵan sırek ánderdi iriktep, óz daýysyńmen kúıtabaqqa jazdyr. Bul – bolashaq urpaqqa qalar baǵa jetpes qazyna», dep aıtqan eken. Sol amanat oryndalyp, Qaırat Kákimov 132 án engizilgen jeke albomyn shyǵardy. О́ner keshinde onyń tusaýyn Qazaqstan jáne Qyrǵyzstan Respýblıkalarynyń eńbek sińirgen qaıratkeri Ilıa Jaqanov kesip, batasyn berdi.
Qaırat Kákimovtiń shyǵarmashylyq keshinen bastalǵan óner merekesi «Án darııa dúldúlderi» I respýblıkalyq dástúrli ánshiler baıqaýymen jalǵasty.
Baqytgúl BABASh,
«Egemen Qazaqstan»
ATYRAÝ
